Lampard ngenna vangin Giroud a cham

Chelsea striker Olivier Giroud-a'n January thla khan London club chhuahsan a tum a, khelh tamna tur club zawm a duh. Amaherawhchu France striker hian a rilru a thlak a, May thla khan season khat dang cham turin contract a pawtsei.

Kum 33 mi Giroud chuan manager Frank Lampard vanga London club-a cham a nih thu a sawi chhuak. Arsenal striker hlui chuan, "January thla khan London club hi chhuahsan ka tum a, Euro 2020-a France squad-a tel tur chuan khelh tam ka mamawh. Club hi ka chhuahsan teuh takzet a, mah se Pathianin cham turin min duhah ka ngai.

"Manager-in thlakna tur an awm loh avangin mimal takin chhuahtir min phal loh thu min hrilh. Mi zawng zawngin thil thlen dan an hriat vek avangin sawi zau ka tum tawh lo a, chutihrualin inkhelh tam erawh min tiam. A thusawiah a ding a, ka theihna pholan theihna tur hun ṭha min pe," tiin Lampard-a ngenna avanga cham a nih thu a sawi.

France international striker hian Chelsea-a cham tura thutlukna a siam hnuah Manchester United lamah goal a khung nghal a, offside vangin pawm a ni lo. Hemi hnu hian Champions League khel tura an elpui Tottenham Hotspur lamah a khung a, an match hnuhnung berah Everton lamah a khung bawk.

Giroud chuan, "Nomawi chawi zel ka duh a, manager bulah rintlak ka nihzia pholan ka duh," tiin a tikimtu nih a tum loh thu a sawi. French striker hian entu awm loa inkhelh a ṭul dawn avangin football-in a hlutna ṭhenkhat a hloh a rin thu a sawi tel bawk.

Chelsea hian Premier League-ah point 48 hmuin palinaah an awm mek a, an chunga awm Leicester City (53 pts) chu point ngain an pha lo a, an hnuaia awm Manchester United aiin point thumin an sang thung.