United an insiamrem thiam - Ighalo

Manchester United striker Odion Ighalo chuan Covid-19 vanga training dan kalphung thar chungchangah an insiamrem theih thu a sawi a, Aon Training Complex-ah social distancing dan ṭha taka an kenkawh thu a sawi lang bawk.

Kum 30 mi Ighalo chuan, "A ni telin hma kan sawn zel a, kar hnih chhung chu a hu hoin kan training tawh a, inelna hmachhawn turin kan inpeih hnai. Inkhel turin kan hriam ṭan a, fitness pawh a ṭha tawh a, engkim a kaltluang," tiin an training dan chungchang a sawi.

Nigerian striker hian January 31 khan loan hmangin Shanghai Shenhua aṭangin Manchester United a zawm a, May 31 khan inbiakremna hmasa a tawp. Ighalo contract chunchangah June 1 khan club pahnihin inremna an siam a, Watford striker hlui hi January 2021 thleng Old Trafford-ah a cham dawn.

Ighalo chuan, "Kan training dan hmang erawh a mak ang reng hle. A chhan chu kan khelhpuite be tur pawhin metre hnih tala hlaa awm a ngai. Tun hma kha chuan hnai takah kan inhrilh mai kha a ni a, a mak duh ang reng hle. Amaherawhchu kan him nan kan tih a ngai a, inelna chhunzawm theih nan kan tih a ṭul a, kan hna a nih miau avangin lawm takin kan pawm," tiin kalphung tharah a vui loh thu a sawi.

Manchester United hian Covid-19 vanga inelna chawlh a nih hmaa an match hnuhnung berah entu awm loin LASK an hmachhawn a, 5-0 in hnehna an chang. Hemi chungchang hi sawiin Ighalo chuan, "LASK nen kan inkhelh kha chuan kan khelhpuite ṭawng zawng zawng kha kan hre thei a, inkhel dangah chuan mipui thawm vangin a hriat vek theih loh. Mipui tel loh chuan inkhelh a nuam lo a, chutihrualin kan himna tur a nih avangin kan tih a ngai si," tiin a sawi.

Ole Gunnar Solskjaer hote inhliam vangin February-March thlaah an buai a, an player pawimawh Marcus Rashford leh Paul Pogba te an chhawr thei lo. Tunah erawh an dam kim tawh a, Nigerian striker chuan, "Player kan kim tawh a, Paul-a'n training pangngai a zawm tawh. Rashy pawh kan zingah a rawn tel tawh. Squad pumpui an dam tawh a, kan inpeih vek tawhin ka hria. Kan thawkrim a, inelna pawh ṭha taka kan khelh theih ka beisei a ni," a ti.