Arsenal an nui - Auba an la, Ozil a nghet

Transfer tawp niah Arsenal-in an club history-a player manto ber ni turin Borussia Dortmund aṭangin Pierre-Emerick Aubameyang chu pound maktaduai 56-in an lalut a. Mesut Ozil chuan a hma lam hun tichiangin kum thum leh a chanve daih contract a ziak bawk.

Ozil a rinawm
Kum 29 mi Ozil chuan Arsenal-a cham zel turin kar khatah £350,000 a hlawh dawn a, hei hi chhiah pek hmaa a hlawh tur zat a ni.

Nimin khan Germany international hian club training ground-ah contract thar hi a ziak a, Arsenal player zinga hlawh tam ber a ni ang.

Ozil hian kum 2013 khan Real Madrid aṭangin Gunners hi pound maktaduai 42.4 in a zawm a, a hun laia London club player manto ber a ni.

Pet goal-tu
Kum 28 mi Aubameyang hian Borussia tana season li leh a chanve a khelh chhungin Bundesliga-ah match 144 a inlan a, goal 98 a khung. Auba hian French club Saint-Etienne tana a khelh lai aṭang tawhin season sarih chhung chu season tinin goal 10 aia tam a khung ziah a, tun season-ah pawh match 24 inlan tawhin goal 21 a khung a, league bikah ringawt pawh goal 13 a khung tawh a ni.

Gabon striker hian German club tan minute 116 danah goal a khung a, ani aia Dortmund tana record nei ṭha chu Bayern Munich striker Robert Lewan-dowski (107 mins per goal) chiah a awm.

Auba hi an ram Gabon captain a ni a, ram tana goal khung tam ber a ni a, Gabonese zinga African Footballer of the Year award dawng hmasa ber ni turin kum 2015 khan chawimawina ngaihhlut hi a dawng tawh bawk.

Arsenal-in Manchester United aṭangin Henrikh Mkhitaryan an lalut a, Armenian midfielder hi Dortmund-a Auba khelh dan hrethiam sa a nih avangin Gunners tlarhma an hlauhawm sawt a rinawm.

Club pathum inthlunzawm
Arsenal tan Borussia Dort-mund duhlai Pierre-Emerick Aubameyang lakchhuah hi a awlsam lo. German club hian a thlakna tur neih phawt an duh a, Chelsea aṭanga loan hmanga Michy Batshuayi an lakluh hnuah chauh Auba hi an chhuah.

Kum 23 mi Batshuayi hian tun season tluanin Dortmund tan a khel ang a, Blues-in a thlakna tur an zawng thung ang. Blues-in Tottenham Hotspur forward Fernando Llorente an duh avangin Belgian forward hi a thleng nan hman an tum a, amaherawhchu FIFA World Cup thlir chungin Batshuayi hian a khelh phakna tur club-a kal a thlang.

Chelsea hian Arsenal aṭangin Olivier Giroud an lakluh a rinawm a, he thuziah lai hian an la tichiang lo. Thlasik transfer hi tukin zing dar 4:30 (IST) khan a tawp a, he thu i chhiar meuh chuan engkim a chiang tawh ang.