Spurs winger thar Lucas

TottenhamHotspur chuan Paris St-Germain aṭangin winger Lucas Moura an lalut a, Brazilian forward manah hian pound maktaduai 25 an inseng.

Moura hian nimin khan medical a paltlang tawh a, he thu buatsaih a nih lai hian Spurs-in official taka an la tlangzarh loh avangin a contract rei zawng kan hre hman lo.

Brazil tan vawi 36 inlana goal li khung thei winger hian kum 2013 khan Sao Paulo aṭangin PSG hi a pan a, a hunlai hian football khawvela rawlthar beiseiawm pawl niin French club hian a man zatah pound maktaduai 33.5 an seng.

Mahse, season hmasaa goal 18 khungtu winger hian tun season-ah inkhelhna hmun a chang meuh lo a, substitute ni chungin match ruk chiah a la inkhel. Tun hnaiah a duh chuan club thar a zawn theih thu hrilh a ni a, London lama insawn turin thutlukna a siam ta a ni.

Lucas hian PSG-a hun a hman chhungin league match 229 a khel a, goal 46 khungin assist 50 a nei thei. France football-ah nomawi 13 a chawi hman a, heng zinga pali hi league nomawi niin London Olympics 2012-ah khan Brazil chu silver medal a lakpui bawk.