Reds a sen mawi leh ta

Match hnih chhung a zawna an tlawm hnuah Liverpool an tho ve leh ta–Merseyside club hian Thawhlehni zan khan an mikhualna ramah Huddersfield Town chu 3-0 in an sawp a, hnehna an chang chiang hle.

Reds tan Emre Can chuan goal hmahruai a khung a, Roberto Firmino leh Mohamed Salah ten goal khat ve ve an khung bawk–Huddersfield-in a chhanletna tur an nei thei lo.

Liverpool boss Jurgen Klopp chuan, "Inkhel ropui tak tia sawi tur a ni lo a, mah se kan game-ah kan puitling tih a lang a, kan mamawh tak result kan hlawh chhuak a ni," tiin hnehna an chang leh ta chu a lawm thu a sawi.

Thutlukna huaisen
Liverpool boss Jurgen Klopp-a'n thutlukna huaisen thlak tak siamin Virgil van Dijk chu bench-ah a dah a, tlarhnung phui lo nia sawi Reds-in pound maktaduai 75 man defender tel loin an khel.

Reds tlarhnungah hian Dejan Lovren leh Joel Matip inkawp tir an ni a, Klopp-a'n thutlukna a siam sual lo–goal an chhuah lo.

German coach chuan a thutlukna chungchang hi sawiin, "Thil thleng ṭhin ve pangngai mai a ni. Lovren leh Matip hian an khel dun rei tawh zawk a, an in man zawk. Fitness chungchangah buaina a la awm bawk a, kum chanve kan thlen meuh chuan Virgil hi player dang daih a ni tawh ang," tiin Dutch defender-in hun a la mamawh thu a sawi.

Ṭhianṭha indona
Liverpool boss Jurgen Klopp-a'n Borussia Dortmund a enkawl laiin tuna Huddersfield boss David Wagner hi a coaching staff zingah a tel a, German club Mainz-ah pawh khel dun tawhin coach pahnih hi ṭhian ṭha an ni.

Inkhelh hmain Wagner hian Reds barakhaih an tum thu a sawi a, a team rem dan aṭangin a hriat–tlarhnungah player panga a remkhawm. Mahse, Swansea-in an hlawhtlinpui tactic hi Wagner-a'n a hlawhtlinpui ve lo.

Minute 26-na lekah Emre Can chuan yard 25 vela hla aṭangin

goal hmahruai a khung a, Huddersfield tlarhnung a pawp zui. Chawlhlawk hun pek belhah Firmino a inlar ve leh a, angle tight zet aṭangin goal hnihna a khung. Can-a'n penalty a hlawhchhuah hnuah Mo Salah a lo pen chhuak a, tun season-a a goal 26-na tur a khung.

Hei le Liverpool

Liverpool boss Klopp chuan, "Team ṭha zawk kan ni a, midfield lamin an hna an thawh ṭhat avangin tlarhnung tan hna a awlsam sawt a ni. Duhthusama khel erawh kan ni lo a, tunah chuan Tottenham hmachhawn tura kan inbuatsaih lehnghal a ṭul," a ti–Reds hian Pathianniah Spurs an mikhual lehnghal ang.

Klopp-a ṭawngkam aṭangin a lawm a kim tawk lo tih a lang. Reds tan Sadio Mane chuan goal khungna remchang vawi hnih a neihah a khung lo a, Huddersfield tana minute 17-na leka Laurent Depoitre chance kha goal ngat se chuan inkhel result danglam thei a ni.

Huddersfield Town manager Wagner chuan, "Team ṭha zawkin hnehna an chang a ni. Team ṭha zawk lak aṭanga point hlawh chhuak tur chuan kan ruahman anga engkim a kaltluan a ngai a, chu chu a thleng si lo," a ti a, team ṭha zawkin hnehna an chan thu a sawi.