Tuikual aia huai Vikings

Mizoram Super League champion lai Mission Veng Vikings chuan an match hmasa berah Tuikual South chu 64-59 in an hneh nghal. Zanin dar 7:30 hian Hawl Indoor Stadium, Repubic Vengthlangah Khatla TBL leh Zarkawt BCA te an intawng zui ve leh nghal ang.

Thawhlehni zan inkhelah Vikings tan Ronald March Jr a la inlan lo a, tualchhung player hlanga khel an nih avangin club pahnih an intiattawk hle. Tuikual tan Lalnunpuia Renthlei-in (R-a) point 22 a score bakah rebounds vawi sarih la bawk mah se Phengphehlep chak pui turin a tawk zo lo.

Second 13 chiah a awm tawh tihin R-a'n TKS tan 3-point a lut a, 59-59 a ni. Tuikual South guard Lalremruata'n point hmuh zat hre chiang loin Michael F. Lalawmpuia lakah a foul zui a, tawnhriat nei ṭha Ramhlun North tlangvalin free throw pahnih chu point-ah chantir ve vein hnehna a chan pui a, Phengphehlep lakah fal chho zuiin a tawpa champion lai Vikings chakna zat chu 64-59 a ni.

TBL vs BCA
MSL season hman zawh tawh pathumah Khatla TBL leh Zarkawt BCA an intiattawk thei hle, mah se Khatla team hian tawnhriat nei ṭha H. Laldinsanga an neih avangin a chungnung zawkah an ṭang ṭhin–vawi hnih an champion tawh.

Khatla TBL hian Most Valuable Player ni tawh Mapuia leh Vanlalmuana an la nei a, TKS tana player ṭangkai ni ṭhin Vanchuangpuia an neih belh bawk, Chp-a bakah an neih sa Gospel Lalthawmmawia leh Eddie Zaithanmawia te pawh BCA tana ven ngun ngai tur an ni.

Zarkawt BCA lamin season hmasa khan league round ṭha takin khel mah se, semifinal-ah TBL an ngam lo. BCA hian Vikings tana nomawi chawi tawh Lalrina Renthlei an lalut thar.

BCA tan TBL hneh turin Zarkawt tlangval Matthew Remtluanga Sailo a chetṭhat a ngai dawn. MSL3-ah khan Zonunsanga leh Henry Lalramngaihawma ten an thiam zia an lantir tawh–TBL hneh tur chuan huaisenna leh thawhhona ṭha an mamawh ang.