20 GER Federer

Roger Federer-a'n season hmasa khan rin loh tak maiin Australian Open nomawi a chawi a, Grand Slam champion a nih aṭanga kum nga hnuah hlawhtlinna lian a chan lehna hmasa chauh a nih avangin khawvel a barakhaih. Tennis player ropui tana malsawmna duhawm bik tih hialin an sawi sak.

Nikum kha chuan Federer hi kum 35 mi a ni a, a khup leh hnungzâng na vanga thla ruk a chawlh hnua rawn kir a ni. Seeded 17-na nichungin Melbourne Park-ah bul a ṭan a, rinkai ni phak lo chunga a hlawhtlinna khan sawi zui a hlawh. Mahse, thahrui ngaihhnemna tennis huangah Federer hi ropui taka a thawhchhuah leh ai chuan a zuih ring an tam cheu.

Amaherawhchu, tun hnai thla 12 chhungin Federer hian Grand Slam nomawi pathum a chawi a, kuminah pawh kum 36 mi ni chungin Aussie Open-ah amah khing zotu an la awm chuang lo. Final-ah set hnih a hloh bak chu set dang hloh miah loin a vawi 20 nan Grand Slam champion a ni leh thei!

Ringhleltu ten Federer chungah rinna an nghat ngam leh thlap tawh; a ṭuan a muang, tharum a ngah tawk lo tih leh a kum a tam deuh tawh avangin player dangte aiin a chau hma tawh, tia selna anka leng vel chu dawt maiah a chantir. Roger Federer-a hun tawn lai hi hman lai thawnthu ropui ni loin tun huna kan tawn leh mita hmuh mek a ni–a vanglai inkhel hmu phak te hian vannei an la in ti dawn.

Number mai
"Duhthusam a thleng dik a, thawnthu ngaihnawm chu a inchhunzawm zel a ni. Tun hnaia ka khelh dan hi chu keimah ngei pawhin awih har ka ti," tiin tun hnai Grand Slam panga zinga pathum chawi thei Roger Federer chuan a sawi.

Kum 36 mi Federer hi mipa player zingah nomawi lian chawi hnem ber a ni a, hmeichhe singles player ropui Margaret Court, Serena Williams leh Steffi Graf te nen Grand Slam nomawi vawi 20 chawi tling thei an ni. Open Era chinah chuan Ken Rosewall (37 years) tih lohah major tournament champion thei upa ber a ni.

Swiss star Federer chuan, "Hlawhtlinna dang chan leh châkin ka tuihal a, chutih rualin ka inkhelh chhoh dan tur hi uluk taka ka duan thiam a pawimawh. Hun hlimawm a rawn thlen zel ka beisei a, ka ngaihdan chuan kum hi chu a pawimawh ber lo, number mai a ni," tiin a sawi.

Federer hian a kum zat a chiang a, tournament zawng zawngah a inlan vek chuan a taksain zo dawn lo tih a hre bawk. Season hmasa pawh khan Australian Open hnuah French Open a khel lo a, grass court inelna ngaihhlut ber Wimbledon-ah erawh a vawi riat nan a champion zui thei a ni.

Grand Slam tournament-in professional player te inlan ve an phal chin, kum 1968 chin hi tennis khawvelah chuan Open Era tih a ni. Open Era chinah hian mipa singles nomawi lian chawi theih 200 a awm tawh a, heng zinga 10% chu Federer kuatah a lut.

Mittui chu...
Rilru nat luat tuk vangin mittui a tla ṭhin a, lawm avang pawhin biangah mittui a luang ve thei bawk. Aussie Open 2018 nomawi a chawi laiin Federer-a biangah lawm avangin mittui a luang a, hei hian Swiss tlangval thinlung chu lawmin a khat tih a tarlang chiang hle.

A zawna chawlhkar 237 chhung world number 1 ni tawh ṭhin Federer chuan, "Ka rilru a no nghulh a, stadium chhunga mipui pungkhawm khat tlat te khan min lawmpui tih ka hria, ka tan chuan khatiang hun tawn aia lawmna tur dang kha a awm chuang lo, nomawi hi an tan a ni e,"

"Biang a mittui luang hi ka duh vang a ni bik lo a, mahse a ken tel chu a ni. Ka hlim a, lawm avangin ka thinlung a tuiral," tiin a sawi. Federer hian hliam a nei lo a nih chuan player hlauhawm ber a la ni tih a chiang a, tun season chhung ngei pawhin a mittui a luang nawn a nih pawhin a mak lo ang.

Kawng a awm?
Tennis player khel lai zingah Rafael Nadal (16 Grand Slam titles), Novak Djokovic (12), Andy Murray (3) leh Stan Wawrinka (3) te chu Federer hnaihtu te an ni. Tuna an dinhmun thlir chuan Nadal bak hian a khing zo meuh lo niin a ngaih theih, Spain tlangval tan pawh umphak tur chuan thil mak thlentir a ngai tawh dawn.

Player beiseiawm Alexander Zverev Jr leh Bernard Tomic ten senior player an la khing zo meuh lo a, theihna nei sang Nick Kyrgios pawh nungchang ṭha tawk lo vangin court chhungah a hlawhtling tawk lo nia ngaih a ni bawk.

Tun Australian Open-ah khan Hyeon Chung leh Kyle Edmund ten semifinal an khel phak a, anni pahnih hi kum 21 leh 23 an ni. Mahse, Chung leh Edmund te pawh player ṭha tak ni nachungin Federer lakah chuan an ruh a la no deuh–kum 36 mi Federer hnen aṭangin inzirna tur an ngah zia an hria ang.

Infiamna huang hrang hrangah player ropui leh ṭha bik an awm thei a, an chawr chhuak zeuh zeuh. Tunlai tennis khawvelah chuan Roger Federer hi record nei ṭha ber a ni a, nomawi lian dang chawi belh tawh miah lo pawh ni se tuna a thlen chin chauh pawh hi ṭhangthar ten hahipa an sawi tur a ni.