Iran club-in Aizawl FC an hneh hram
Aizawl FC-in an mikhualna ram Iran-ah Thawhlehni zan khan Zob Ahan Esfahan FC an hneh lo. Mizo club an chak zawh loh avangin India club zingah AFC Champions League khel thei an la awm lo a, I League champion lai hian AFC Cup an khel ang.
Mizo club an fei
Foolad Shahr Stadium, Isfahan-ah Zob Ahan-in minute thumna lekah penalty an hmu a, Mahdi Rajabzadeh chuan Aizawl FC keeper Avilash Paul bumin chiang takin a khung. Indian club-in goal tam zawk an chhuah rinawm mah se Mizo club-in huaisen takin an bei let a, minute 21-naah R. Laldinliana ball pek chu Andrei Ionescu-a'n goal-ah a chantir avangin beiseina thar an neih phah.
Paulo Meneses-a hoten goal venhim hna an thawh chhunzawm avangin Zob Ahan an talbuai a, amaherawhchu hun tawpah club ṭha zawk danglamna a lang. Vice captain Morteza Tabrizi chuan minute 83-na leh injury time-ah goal a khung a, heng goal hnih hi Mohammed Hosseini siam sak ve ve a ni a, chak phu zawk Zob Ahan 3-1 in an chak.
Harsatna karah
AFC Champions League playoff hi match khat chauh khelh a ni a, ranking-a sang zawk khelmualah khelh ṭhin a nih avangin I League champion tan a harsa dawn tih chu hriat sa a ni.
Harsatna inṭanna tak erawh Mizoram Premier League Season 6 tawp lam leh I League ṭan hun a inrual vang a ni. MPL final-ah Aizawl FC-in hahchawlhna hun ṭha an neih loh avangin Chhinga Veng an ngam lo a, season liam taa I League-a an champion ṭum angin nomawi humhim tuma bul an ṭanin MPL club dang aṭangin player ṭha an senglut hman lo.
Inpeih loin I League an khel tih an result-ah a lang a, kar hnih chhung leka match li an khelh hnuah Iran an pan. An foreigner pali ziah luh zinga pakhat Kareem Omolaja chu inhliam vangin a tel thei lo a, Nigerian defender aiawh tura dahluh tum Leonce Dodoz pawh visa a fel hman loh avangin Delhi bak a thleng lo. India khawpuia ni hnih chhung visa buaipuia an awm hnuah thlawhtheihnaah darkar 30 bawr vel an chuang a, an zinkawng hau tak tak hian an inpuahchahna a pui lo.
Chenna ngai loh ram Iran an thlen niah vawi khat practice-na hun an nei a, khaw vawt hnuaiah an khelh a ngaih bawk avangin Mizo club-in hun tawp thlenga Zob Ahan an tibuai thei hi an chhuanawm hle.
Iran club an ṭha
Asia khawlmualpui aṭanga 2018 FIFA World Cup khel tura tling hmasa ber chu Iran an ni a, he squad-ah hian Zob Ahan keeper Mohammed Rashid Mazaheri chu second goalkeeper ni pha chauh mah se Mizo club nen an la inthlau hle.
Zob Ahan hi AFC Champions League-ah kum 2010 khan pahnihna an ni a, Mizo club an hmachhawn ṭuma captain Mehdi Rajabzadeh kha Iran League-a top scorer ni tawh leh ram tan pawha vawi 16 zet inlan tawh a ni. Indian club-in squad tih chak nan foreigner an la ṭhin a, Mizo club hmachhawn te hi chutiang foreigner hlang chu an ni a, India rama lo kal tam zawk aiin an ṭha bawk.
Coach thukhawchang
Aizawl FC coach Paulo Meneses chuan, "Asia ram club ṭha ber zinga mi kan hmachhawn tih kan hria a, chak lo mah ila ka naute khelh danah ka lawm hle a ni. Zan hnih kan mu mumal lo a, khua a vawt em em a, kim loa kan zin tawh hnuah William-a a inhliam lehzel avangin kan ṭhat dan berin kan khel tluan thei lo. Chutihrualin minute 90 chhung kan tibuai thei a, inchhuanna tham a ni," tiin an thlen chinah a lungawi thu a sawi.
Mizo club hian nimin khan Iran an chhuahsan a, nizan khan Istanbul aṭangin Mumbai an thleng ang. Aizawl FC hian February 3, Inrinniah I League match an nei nghal dawn a, Chennai City nen Coimbatore-ah an inhmachhawn ang.