A tawpah Electric Veng leh Saron Veng invawrh

RFL Plastics MFA Futsal League-ah Chanmari, Chhinga Veng FC, Electric Veng FC leh Saron Veng ten group A aṭangin quarter final an lut. Thawhlehni zan R. Dengthuama Hall-a inkhelah hian goal 42 zet a lut a, Dawrpui leh Bawngkawn tan erawh zan lungchhiat thlak a ni.

Round 6 khelh zawhah Bawng-kawn chu palinaah an awm a, inkhel hmasa berah Chanmari lakah 6-1 zetin an chak lo. Chanmari-in vawi sarih an khelh an khingpui an hneh vek a, group hmahruaitu an ni bawk.

Saron Vengin Chanmari kawng sial sak chu hmang ṭangkai nghalin Dawrpui chu 11 - 4 zetin an sawp. Inkhelh zawhah Saron chu pasarihna aṭangin pathumnaah an invawrh chho a, Dawrpui chu palinaah niin Bawngkawn tan quarterfinal-ah hmun a awm lo.

Bungkawnin point 10 hmu tawh Saron Veng an hneh tawh avangin Chhinga Veng an hneh chuan head to head hmangin quarterfinal an lut thei a. Amaherawhchu, 5-4 a hma an hruai tawh hnuah Chhinga Veng tan Vanlalhriata'n goal hnih a khung belh a, Bungkhawn beiseina a tawp.

Round 6 zawhah Electric Veng chu pangana ni mah se an fixture a fuh a, match hnuhnung berah chak hmel hmu lo Kanan chu 7-2 in an hneh a, quarterfinal khel turin an tling.

Nizan khan group B lamin an match hnuhnung ber an khel a, quarterfinal lut tur kan la hre kim lo. Knockout stage hmasa ber hi February 6-9 inkara khelh tur a ni a, double leg-a khelh tur a ni.