Copa del Rey Final luh inchuh tur Barcelona leh Valencia
Spanish Cup semifinal chu zanin dar 2:00 hian khelh a ni dawn a, Barcelona chuan Valencia an mikhual dawn - team pahnih hi La Liga lamah pawh team hmuhnawm an ni a, zanin an inhmachhawn tur hi a hmuhnawm ang.
Ernesto Valverde enkawlna hnuaiah Barcelona an hmuhnawm a, La Liga match 21 an khelh tawhah tlawm hmel an la hmu miah lo - Valencia-in pathumna dinhmun an luah a, Barca an phak lohna chu point 17 a ni.
Valencia tan nomawi beiseiawm awmchhuna chhal ngam chu Copa del Rey a ni a, zaninah hnehna chan ngei an duh ang.
A harsa dawn
Valencia-in an league match hnuhnung berah 4-1 ngawtin Real Madrid an ngam lo a, zanina an hmachhawn tur Barcelona hi Real aia goal khung 'thiam' zawk an nih rih avangin a harsa dawn tih a chiang.
Barcelona chak apianga an hming ziah tel ngai ṭhin chu Luis Suarez leh Lionel Messi te an ni a, anni pahnih dan ringawt pawh hnaa neih tham a nih tawh tehlul nen Philippe Coutinho an la neih belh cheu - dan an awlsam lo ang.
Suarez-a'n beisei angin season bul ṭan lo mah se a thiam a la theihnghilh lo tih pholangin goal khung a uar leh tawh a, match 29 a khelhah goal 18 a khung tawh. Goal sawi a nih tawh chuan Messi hming lam tel a ngai ṭhin a, Argentina captain hian tun season-ah match 32 khelin goal 27 a khung leh der tawh.
Intawnna hmasa
Team pahnih hi tun hmain vawi 55 an lo intawng tawh a, thawnthu hlui keu let chuan Barcelona an chungnung zawk - vawi 28 hnehna an chang a, vawi 12 an tlawm. Vawi 15 erawh chak zawk awm loin an in ṭha ṭhen.
Tun season-ah team pahnih hi vawi khat an intawng tawh a, chak zawk awm loin 1-1 in an inhnehtawk. Team pahnih inhnehtawkna erawh Valencia khelmual a ni a, semifinal first leg an khelhna tur erawh Nou Camp a nih avangin a boruak a danglam ang.
2015-16 Copa del Rey semifinal-ah team pahnih hi an lo intawng tawh a, Valencia fan-ten hei erawh thlir let an duh lo ang - an mualah 1-1 in inhnehtawkpui mah se Nou Camp-ah 7-0 ngawtin an tlawm a, hetihlaia an coach Gar Neville chuan, "Football-a ka hun tawn tawhah chuan a la mualpho thlak ber," tiin a lo sawi tawh.