Mbappe hnawhchhuah zanah PSG chak

Thawhlehni zan French League Cup semifinal inkhelah Paris St-Germain chuan Rennes 3-2 in an hneh hram a, video assistant referee (VAR) hman a nih hnuah PSG forward Kylian Mbappe chu hnawhchhuah a ni.

Mikhual PSG hian Thomas Meunier, Marquinhos leh Giovani Lo Celso te goal hmangin si thum faiin hma an hruai a, mah se minute 63-naah Mbappe chu Ismaila Sarr laka a foul vangin red card pek a ni.

Mualneitu Rennes lamin West Ham forward hlui Diafra Sakho leh Sanjin Prcic te hmanga goal khungin beiseina an insiamthar leh. PSG an buai a, Rennes an phur zual, a si phurh sut zawh nan winger Wahbi Khazri-a'n goal khung leh mah se VAR hman a nih hnuah handball vangin pawm a ni lo.

PSG tana goal 13 khung tawh Mbappe chuan, "Ka hna ka thawk ṭha lo a, hnawhchhuah ka ni kha pawi ka ti hle. VAR hian thil dik lo a hai lang thei a, football hmasawn nana hmanraw ṭangkai tak a ni ang," tiin a sawi.

Monaco leh Montpellier ten nizan khan semifinal hnuhnung zawk an khel a, he thu buatsaih lai hian result kan hre hman lo; a chak zawk leh Unai Emery nauten nomawi an inchuh leh ang.