India vs South Africa Number 1 nih inchuhna inkhel

Vawiin tlai dar 4:30-ah India leh South Africa chuan ODI series match ruk an khelh tura an match hmasa ber an khel dawn a, team pahnih inhmachhawn tur hi ODI ranking-a number 1 nih inchuhnaah pawh chhal theih a ni.

Ram pahnih hian test series an khel zo tawh a, 2-1 in mual neitu South Africa an chak - mah se match hnuhnung berah India an chak hlauh avangin ranking a ti danglam lo a, test lamah chuan India hi number 1 an nih chhunzawm zel. An hnuai chiaha awm South Africa aia an sanna zat hi point ruk a ni.

ODI ranking lamah chuan South Africa-in number 1 dinhmun an luah mek a, Men in Blue (India sawina) aia an san zawkna erawh point khat chauh a ni - chumi awmzia chu team pahnihin ODI series match ruk an khelh tura match zawng zawng hian team pahnih ranking a hril nghal zel ang.

India tana chanchin lawmawm chu South Africa thiampuipa AB de Villiers chu hliam vangin ODI series match hmasa pathumah a inlan thei dawn lo a, kar hnih tal dam chiang turin hun a mamawh.

Kum 33 mi batsman hian India nena an inkhelh ṭum thoin hliam hi a tuar a, test match series an khelha match thumnaah a inhliam - hetihrual hian South Africa hi Faf du Plessis, Hashim Amla, Quinton de Kock leh JP Duminy te neitu an la nih tho avangin zuam ngawt erawh a fuh lo ang.