Barca-a châm turin Messi-a’n 50%-in a hlawh a tihniam

Lionel Messi chuan Barcelona nen a thuphungin inremna an nei a, kum 2026 thleng Catalan club-ah a cham dawn. Kum 34 mi Messi hian kum nga daih contract a ziak a, a hlawh erawh 50%-in a tihniam dawn niin an sawi thung.

Barca leh Messi ten inremna an neih theih loh avangin June 31, 2021 khan a contract neih lai a zo a, July 1 aṭang khan Argentina captain hian club a nei lo.

Thil awm dan
Barcelona hian kar hnih hnuah chauh Messi an chelh thu hi an puang dawn. Catalan club-in an la puangzar loh chhan hi Messi-a'n chawlh a hman mek avang leh La Liga-in hlawh pek tura an bituk zat an pelh avanga player ṭhenkhat an thehchhuah a ṭul vang a ni bawk.

Barca chairman thar Joan Laporta hian president inthlannaah Messi chelh chu thupuiah a hmang a, a thusawiah a ding. Catalan club hian player hlawh tihhniam nan Antoine Griezmann leh Atletico Madrid midfielder Saul Niguez te chu inthleng an tum a, an hlawhtlin a rinawm bawk.

La Liga hian club tluchhe ven nan hlawh pek dan a bithliah a, 2019-20 season-ah kha chuan Barca hi salary cap hi €671m a ni a, nikumah khan €347m niin season tharah €160m bawr vel a ni dawn. Heti taka Catalan club dinhmun chhiat chhan hi president Josep Maria Bartomeu hnuaia an inenkawl dan mumal lo leh transfer-a player an lei fuh loh vang te a ni.

Barca hian player ṭhenkhat Junior Firpo, Jean-Clair Todibo leh Carles Alena te an hralh tawh a, player langsar an chhuahtir a ṭul. Catalan club hian an player lak thar Sergio Aguero, Eric Garcia, Emerson Royale leh Memphis Depay te pawh an ziaklut thei lo.

Messi hlawh chu
Spanish chanchinbu El Mundo chuan Messi contract hman zawh tak chungchang kha kim takin an tarlang. El Mundo tarlan dan chuan Messi hian kum li chhungin euro maktaduai 555 ($674 million) hlawh thei hial angin an ziak.

Bonus tel loa Messi contract erawh pound maktaduai 492 ang hu a ni a, season khatah pound maktaduai 123 a hlawh pha. Chutihrualin a hlawh lak danah hian club tana a rinawm vanga bonus an pek dan turte a awm a hrang a, chhut dan hrang hrang awm zingah kar khatah euro maktaduai 1.35 a hlawh tih chu a awm ang ber zinga mi a ni a, heti zawnga chhut chuan kar khatah pound maktaduai 1.15 vel a hlawh.

Messi hlawh hi 50% a tlahniam a nih chuan tuna a hlawh tur hi kar khatah £575,000 a la hlawh dawn tihna a ni. Chubakah chuan kum nga daih contract a ziak a, kum 34 mi a nih tawh avangin Messi hian a contract hi a hman zawh kher a rinawm loh.

Khawvel player ṭha ber ang hiala mi ṭhenkhatin an chhal Messi hian 50% laia a hlawh a tihniam chung hian Premier League-a player hlawh tam ho Kevin De Bruyne (£385,000), David De Gea (£375,000), Raheem Sterling (£300,000), Pierre-Emerick Aubameyang leh Thomas Partey (£250,000), Edinson Cavani (£210,000) bakah Thiago, Mohamed Salah, Marcus Rashford, Harry Kane leh Tanguy Ndombele (£200,000) te aiin a la hlawh tam zawk ang.