April 3 thleng Premier League chawl dawn

Coronavirus vangin April 3 thleng England-ah football inelna lian tham khelh a ni dawn lo. Premier League, Championship, Football League leh Women’s Super League te chu chawlh lailawk a ni dawn.

March thla tawp hian England-in Denmark leh Italy an hmachhawn dawn a, heng inkhel pahnih pawh hi ṭhulh a ni a. Ticket leitu zawng zawng hnenah ni 14 chhunga an refund tur thu an puang bawk. Premier League chuan, "Premier League, FA, EFL leh WSL te chuan England-a professional match khelh hun chu inlungrual takin sawn an remti. Club neitute nen coronavirus chungchang sawiho a ni a, Premier League chawlh rih ṭha kan ti. April 4 hian inelna ṭan leh tum a ni a, medical lam thiamte thurawn leh thil awm dan thlir tel a ni ang," tiin thuchhuah an siam a, coronavirus hi a la rem lo a nih chuan hun rei zawk pawh an chawl thei ang.

Arsenal manager Mikel Arteta leh Chelsea winger Callum Hudson-Odoi te chuan coronavirus an vei tih finfiah a ni a, club pahnih player-te pawh khung hran an ni tawh. Bournemouth pawhin an hnuaia thawk mi panga an khung hrang a, chung zingah chuan keeper Artur Boruc a tel. Watford player engemaw zat an damloh avangin Ningani training an ṭhulh a, Everton pawhin coronavirus laka inven nan an player-te an dahhran thu an sawi. Coronavirus tuar ber Italy-in April 3 thleng inkhelh an chawlhsan thu an puang tawh a; La Liga, Dutch Eredivisie, Primeira Liga (Portugal) leh Major League Soccer (USA) te pawhin an chawlh thu an puang tawh bawk. Nimin khan Ligue de Football Professionnel (LFP) pawhin thuleh awm hma chu Ligue 1 leh Ligue 2 an chawlh rih thu an puang.

Bundesliga erawhin entu awm loin tunkar inelna an kalpui ang a, hemi hnu hian an chawl chhunzawm ang. Hmahruaitu Bayern Munich chuan zanin dar 11:00 hian Union Berlin an tlawh ang a, Borussia Dortmund-in zanin dar 8:00-ah Schalke an mikhual dawn. Champion beisei zinga mi RB Leipzig pawhin zanin dar 8:00 hian SC Freiburg an hmachhawn ang.