PSG keeper thar Gianluigi Donnarumma
Gianluigi Donnarumma chuan AC Milan tan hlawhtling taka a khelh hnuah Paris St-Germain a zawm. Italy international keeper hian Milan tana a contract a hmang zo a, man nei loin PSG hi a pan - Paris club tan hian kum nga daih contract a ziak.
Ligue 1 club nen hian 30 June 2026 thleng daih inremna an ziak tihna a ni a, tun dinhmunah kum 22 mi chauh a la nih avangin a contract zawh hunah pawh player tam zawkin vanglai nun an hman ang hun kha a thleng ve dawn chauh!
Italian club Milan pawhin Donnarumma thlakna tur an lafel tawh. Season hmasa Ligue 1 champion Lille keeper Mike Maignan chuan San Siro lamah puanthuah a pu lut ve thung - keeper pahnihin an awmna ram an inthleng.
Mangṭha Milan
Naupan lai aṭanga AC Milan ngaisangtu a ni a, youth team aṭanga bul ṭanin Milan senior-ah pawh rinrawl a ni. Kum 22 mi chauh la ni mah se a club tan inelna hrang hrangah match 251 a khel hman, clean sheet vawi 88 a neih chu sulhnu ropui a ni.
Season ruk chhung zet chu Milan tan hian league match 30 a khel tling ziah, season hmasa phei kha chuan inlan lohna match khat chiah a nei. Serie A-ah clean sheet vawi 14 neiin 2013-14 hnua a vawi khat nan Milan chu Champions League khel turin a tlinpui hial.
A hmangaih hmasa Milan tan hian khelh zel pawh a hreh lo ang tih a rinawm. Mahse, Donnarumma hian hlawhtlinna lian tham chan a chak tih pawh a chiang, hun rei tak chhung Milan nen contract chungchang an inbiak hnuah an inrem thei lo.
Paris lamah
Nilaini khan Donnarumma hian Paris khawpui a thleng a, ziah fel ngai an ziak fel nghal. Italian keeper chuan, "He club lian tak tana ka khel thei tur hi ka lawm, chona thar hmachhawn tur hian ka inpeih. Paris nen hian hlawhtlinna tam tak chan ka duh," tiin a sawi.
PSG Chairman and CEO Nasser Al-Khelaifi chuan, "Keini club chuan lawm takin Gianluigi Donnarumma hi kan lo kuangkuah, club mi leh sa, a teammate tur bakah fans zawng zawng pawhin an lo lawm ngei ang tih ka chiang.
"Hlawhtling takin UEFA EURO 2020 a khel a, Player of the Tournament atan thlan a ni hial, a hlawhtlinnaah khan kan lawmpui hle" tiin a player thar a dahsang hle a, a lakah beisei an nei sang dawn.
Player ṭha bik
Italy coach Roberto Mancini-a'n Donnarumma hi a kum la tleng deuh mah se a ringtawk. Euro-ah khan Azzurri tan a feh chhuak a, semifinal-a Spain an hneh ṭumin penalty a dan bakah, final-ah Jadon Sancho leh Bukayo Saka te pet a dansak - Player of the Tournament a ni hial.
PSG-ah hian ram tana a khelh pui midfielder Marco Verratti a awm sa. Donnarumma chuan, "Euro lai khan kan sawidun a, PSG ka zawm tur chu a lawmin min lawmpui hle bawk, kei pawh ani a lo awm sa avangin ka lawm bawk," a ti.
Tun nipui bazar chhungin PSG hian Real Madrid defender hlui Sergio Ramos leh Inter Milan aṭangin Achraf Hakimi an lalut tawh bawk. Neymar, Kylian Mbappe leh Angel di Maria an neih sa bawk avangin UCL an beisei sang dawn.
