Ṭahlai bang tawh rawh Mancini, I thutiam i hlen ta e...

Euro 2020 final zan a ni a, Italy-in penalty hmangin England an hneh a, Wembley Stadium-a, "Football a rûnah a lawi dawn e," tia zai England fan-te thawm a reh a, an biangah mittui a luang ta thung.

Hrilhhai takin England tana penalty pet goal lotu Marcus Rashford leh Jadon Sancho te an hawi a, kum 19 mi Bukayo Saka tan chutiang ang inelna liana penalty hlah chu tawrh zawh chi a ni lo - a mittui a luang a, an lo hnem laih laih a.

Chutihlai chuan pa rorum pakhat biangah mittui a lo luang ve ngiai ngiai a, a chhan erawh a dang thung - lawmna vang a ni. Pa luhlul leh kawhmawh bawl ching, thutlukna siam tura tlanchhe ngai lo Roberto Mancini ngei kha a ṭap a ni.

A player leh coaching staff-ten an rawn kuah bawrh bawrh a, chu hlimna chu thua hrilhfiah chi a ni lo a, sawifiah chi a ni lo - a saka sak pawhin a fiah chuang lo ang!

Hmanah chuan maw
Wembley Stadium-a Mancini-a'n European champion nih a lawm lai khan a thinlungah thil tam tak a awm ang tih a chiang a, chung zingah chuan May, 1984-a a chunga thil thleng kha a langsar ber pawl a ni hial ang.

Hetihlaia World champion Italy chu New York khawpuiah USA nena friendly match khel turin an feh chhuak a, kum 19 mi Mancini pawh Sampdoria tan season duhawm tak a hman avangin koh zingah a tel.

Mahse, coach hriat loh hlanin zanah Mancini a leng chhuak a, an thlenna hotel a kir leh meuh chuan coaching staff zinga pakhat chuan a lo ko peng vat a, "Coach Ezio Bearzot-a'n zing chaw ei turin a nghak che a, fimkhur rawh - a thinrim teh ania," tiin a hrilh.

Mancini-a'n an pu ber awmna lam a pan a, 'thinrim' tih aia nasain Bearzot a thinrim! Mancini chuan, "Ṭawngkam chhe tinrengin min hau a, league-ah goal 40 khung pawh ni ila ram tana koh ka nih tawh loh tur thu min hrilh," tiin a sawi.

Thihna leh beiseina
Mancini-a'n ram tana a match hmasa ber a khelh hnu lawkah international football-a a career chu a tawp a ni ber a, coach rorum Bearzot lahin a thutlukna sut a tum bik lo.

World Cup 1986-ah pawh Mancini chu ram tana koh a ni lo chhunzawm a, player tam tak duhthusam chu a duthusam ve tho ni mah se a ti hlawhtling ta lo - a hnu kumah Bearzot leh Mancini an inhmu fuh a, Bearzot hian, "I ngaihdam dilna kan ngaichang a, mahse, i dil si lo. Ngaihdam dilna tel loin World Cup-a hruai che kha ka tan a rem lo a ni," tiin a hrilh.

Mancini thinlung chu chhun ang maiin a na a, "Khatihlaia ka châk ber chu thih a ni," a ti! Mahse, Mancini tan khua a thim reng bik lo - World Cup last 16 aṭanga an tlak hnuin Bearzot a bang a, Under 21 coach Azeglio Vicini-a'n a hmun ruak a luah zui.

Vicini-a'n ram tana khel turin Mancini a ko chhunzawm a, Italian forward tan beiseina a vul leh ta.

Ngawi rawh u!
Euro 1988-ah ram tan Mancini a feh chhuak a, mahse, hetihlai hian striker tawnhriat nei ṭha Alessandro Altobelli aia thlan a nih avangin media lamin nungchang ṭha lo ve tak Mancini hi an lawm lo hle.

Match hmasa berah West Germany an tum a, Mancini-a'n goal a khung - a ṭhianten a goal khung lawmpui tumin pan mah se a vai kiang a, media ho ṭhutna lam pana tlan pheiin, kut zaizrin media ho chu ngawi turin a ti!

Italy-in semifinal lut mah se Soviet Union ngam loin inelna an mangṭha a, hetihlaia kum 23 mi Mancini-a'n ram tana major tournament a khelh hnuhnun ber tur a ni tih reng a hre lo. World Cup 1990 squad-ah tel mah se a inlan lo tluan a, Toto Schillaci leh Roberto Baggio a tluk lo.

Hetihlai hian hliam vanga talbuai, Sampdoria tana Mancini khelhpui Gianluca Vialli chu ram tan a inlan phak bik lo - mahse, player pahnih hian ram tana an hnualna chu a ṭha zawngin an hmang. World Cup zawhah season duhawm tak hmangin Sampdoria chu tun thlenga an league nomawi awmchhun an chawipui a, an lar dan chu pui tak a ni.

Min ko tawh suh
Mancini tan khua a var rei hleithei lo - Euro 1992 khel turin an tling zo lo a, Italy squad-a Mancini ko lettu Vicini chu a hna aṭangin chawlhtir a ni.

European Cup-a a zawna AC Milan champion pui theitu Arrigo Sacchi chu Italy enkawl turin thlem luh a ni a, player pahnih an inmil rei lo hle. Germany nen friendly match an khelh ṭumin Sacchi hian minute 90 a khelh tur thu Mancini hi a hrilh.

Mahse, Italian coach hi a thutiamah a ding nghet lo - Gianfranco Zola hmuh duha fans an au rual avangin Mancini a la chhuak a, Zola a luhtir. Tiam a nih anga minute 90 khel lo Mancini thin a rim takzet.

Sacchi a pan a, "I thutiamah i ding nghet lo a ni," a ti a, ram tana ko leh tawh lo turin coach hi a hrilh zui - kum 29 mi lek ni chungin a career chu ama duhthu ngeiin a titawp a, hetihlaia Sacchi assistant Carlo Ancelotti chuan pawi ti takin a lo thlir vawng vawng a!

A pawi a ni
Mancini-a'n a insum zawh loh rah a seng a, season duhawm tak a hmang chungin coach induh tawk ve tak Sacchi-a'n ram tan a ko zui lo - Italy erawhin World Cup final hial an lut thung.

Italian forward ṭhin chuan hetihlai hun hi thlirkirin, "Thutlukna dik lo ka siam tih ka hria. Player inhliam, hrem leh boruak san dante ka thlirlet a, kha thutlukna mawlmang tak kha siam lo ila chu World Cup 94-ah khan ka inkhel nual ang," a ti!

Mancini rilru na a dam thei lo. Coach a nih thlengin duhthusam pakhat a nei a, chu chu Italy enkawl a, nomawi chawipui a ni. He thu hi a zep hran lo a, ualau takin a sawi mai zel.

January 2018 khan Gazzetta dello Sport-in an kawmnaah Mancini chuan, "Duhthusam ka nei - player ka nih laia ka tih theih loh tih ka duh a, chu chu World Cup nomawi chawi a ni," a ti a, a kalkawng atan Italy a duh.

Thim zinga êng
Mancini-a'n coach a nih hnuah hna a thawk ropui hle - Fiorentina, Lazio, Inter Milan, Manchester City leh Galatasaray-ah te champion nomawi a chawi vek a, Inter phei chu season thum chhung a zawnin Serie A champion a nihpui.

Mancini-a'n City a chhuahsan hnuah erawh a coaching career-ah pawh ngai a awh lo tih a chiang - Galatasaray, Inter leh Zenit Saint Petersburg-ah te beisei ang result a nei lo a, mahse, hetihlai hi Italy-in hun thim an tawn ve lai tak a lo ni!

Gian Piero Ventura hnuaiah World Cup khel turin an tling zo lo a, an boruak chu chhe tak a ni - Gianluigi Buffon, Andrea Barzagli leh Daniele De Rossi ten ram tana inkhelh an chawlhsan zui a, Italy hma hun a thim takzet.

Italy-in coach tur an zawng a, Italian FA technical co-ordinator Maurizio Viscidi-a'n defending ringawt zir a, counter-attacking football-a innghat coach bansan a duh. "Hetiangte chu school-a entawn tura naupang zirtir ang chauh a ni," a ti tlat!

Tichuan...
Italian football thuneituten attacking football hmuhnawm hmuh ve an duh tawh a, an zingah Billy Costacurta a tel - ani hi Italian infiamna khawvela thuneitu sang ber Italian Olympic Committee-in World Cup 2018 khel tura an tlin loh chhan zirchiang tur pahnih a ruat zinga pakhat a ni.

Costacurta hian Viscidi kaihhruaina hnuaiah Italy-in hma an sawn hret hret tih a hmu a, an mamawh dang chu coach a ni - a rilruah Mancini a lo lang a, World Cup 2018 playoff-a Sweden an hneh lohna inkhel chu a en pui.

Milan defender hlui hian, "Andrea Belotti leh Ciro Immobile khi en teh - keimahni lamah hlir an hun tam zawk an hmang a, khitianga an khelh chuan Sweden khi min attack tura sawm ang chauh a ni. Kei chuan goal khung tuma nawr ṭhin team ka duh," a ti.

Mancini-a'n chhanna a tlachham lo, "I pan tur dik tak i pan a nih chu," tiin a chhang a, Italy coach hna a pawm a, team hmuhnawm din tumin a ngaihtuahna a seng nghal.

A rah chu
Italian FA-in thu-tlukna an siam sual lo - Mancini-a'n Azzuri team hmuhnawm zawk a din thar a, a tum hmasak ber chu player en kual a ni. Euro ṭan a nih hma khan player 35 ngawt chu ram tana an match hmasa ber a khelhtir hman!

Serie A club-te chu an ram team ṭhanna tura an pawimawhzia a hrilh hria a, naupang chhawr ngam turin a rawn - thuin a sawi satliah lo a, a tak ngeiin aman a lantir.

Ram tana inkhel tura Nicolo Zaniolo a koh khan Roma midfielder hian club tan minute khat pawh a la khel lo - mahse, Mancini-a'n a ring miau a, a koh kum season a zawh meuh chuan Roma tan match 36 a khel der!

Zaniolo hian hliam vangin Euro erawh a khel thei lo thung - ram tan match sarih a inlan hman. Hei hi Mancini ṭhatna chu a ni - midang hmuh loh a hmu a, player-in hriat hlawh lo mah se thiam a tih chuan ram tana inkhel tura koh a tim lo a, hming aiin theihna a chawisang zawk.

A tawpah chuan
Euro a thlen meuh chuan team chak tluang ber pawl niin inelna an ṭan a, an player en ila - hming langsar aiin season hmang ṭha an tam zawk a, Mancini duh dan a ni tih a chiang ngawih ngawih.

Group stage-ah an chak vek chungin fiahna hautak hmachhawn loa ngaih an la ni 'ṭalh' a, tunah erawh champion an phuzia bak sawi tur a awm ta meuh lo.

Italy-in last 16-ah team narana ngaih Austria chu harsa takin paltlang mah se Belgium leh Spain meuh hnehin final an lut a, Wembley Stadium-ah ngei England an hneh zui.

Nakkum December a her chhuak ang a, Mancini duh ber World Cup nomawi an chawi a nih pawhin mak ti suh ang che - Mancini-a'n chawlh mai mai a tum tlat lo.