Milwaukee Bucks-in Suns an nih rual
NBA Finals khelh laiah champion tur zawk hriatthiam a harsa rih hle. Nimin zing khan Milwaukee Bucks chuan an mikhual Phoenix Suns 109-103 in an hneh, best-of-seven series-ah team pahnih hi 2-2 in an inhnehtawk mek.
July 18, Pathianni zing dar 6:30 hian game 5 an khel leh dawn, an inkhelh tur erawh Suns lam khelmual Talking Stick Resort Arena a ni ve leh thung tawh dawn, inkhel result a danglam leh tawhin a rinawm.
Bucks an tlawm lo
Game hmasa pahnih kha Phoenix Suns mualah khelh a ni a, Suns hian point 118 ve ve neiin hnehna an chang - NBA champion ni turin an dinhmun pawh an siamṭha hman viau, inrintawkna sang tak nen Fiserv Forum an pan.
An khelmualah Milwaukee Bucks an zam bik lo a, game 3 an lak hnuah game 4 an la leh ta. NBA champion ni tur chuan game li tal lak a ngai dawn, team pahnih hian anmahni khelmualah game khat ve ve an khel chhunzawm leh dawn.
Game 6 thlenga chak zawk an la awm lo a nih chuan game 7 khelh a ni dawn, match hnuhnung ber hi Phoenix Suns muala khelh tur zawk a ni dawn - Bucks tan chuan game 7 khelh ngai lo tura tlang tum a fuh ang.
Hnehna chu
Nimin zing inkhelah team pahnih an inbei tawk hle, chawlhlawk an hman laiin point 52 ve ve an nei. Quarter hnuhnung ber an khelh laiin mikhual Suns lam hi point kuain an sang fal thei a, chak turin an dinhmun a ṭha takzet.
Mahse, hun tawp dawn lamah Bucks tan Khris Middleton a inlar. Point 40 neitu Middleton hian hun tawp dawnah a zawnin point 10 a nei thei a, an thiampuipa Giannis Antetokounmpo-a'n point 26 lo nei ve bawkin hnehna an changlet daih.
NBA Most Valuable Player vawi hnih ni tawh Antetokounmpo chuan, "Dinhmun hniam zawka din hnua thawhchhuah leh theih hi a ropui, beiseina chuai lo kan nei tih a lantir," a ti. Bucks hian 1971 khan NBA title an la tawh, a vawi hnih nan an beisei mek.
Suns an vanduai
Regular season ṭha takin an hmang a, playoff chinah harsatna tawk deuh mah se team ṭha an nihna erawh a lang zel. Bucks mualah pawh chak thei turin an insiamrem hman, mahse shooting guard Devin Booker-a point 42 neih chu chak nan a tawk zo lo.
Guard Chris Paul-a'n beisei a phak lo, game 4 bikah hian point 10 chauh a nei. Paul chuan, "Kan inkhel hi uluk takin kan thlir kir ang a, kan tih fuh tawk loh lai kan siam ṭha ang," a ti a, anmahni mualah chuan result ṭha a beisei thu a sawi bawk.
Suns hian 1968 khan basketball inelna sang ber hi an khel ṭan a, an la champion ngai miah lo. Kuminah hian Paul, Booker, Jae Crowder, Cameron Johnson leh Cameron Payne te hoin champion an tum.
