BAI ranking top 10-ah Mizo naupang

German rama football inelna sang Bundesliga leh Bundesliga 2-ah player panga thlak theih a ni chhunzawm dawn, season thar an kal dan tur hi German Football League (DFL) chuan an tichiang tawh.

Tun hma chuan inkhel pakhatah player pathum a thlak theih ṭhin. Coronavirus vangin infiamna khawvel a buai a, pathum thlak theih ṭhin kha pangaah tih pun niin, hri lengin ziaawm lam pan tawh mah se Germany-ah chuan an kalphung hman lai hi an chhunzawm rih dawn tihna a ni.

Hri leng vangin a hmuna inkhel en theitu pawh an awm ngai lo, season hmasa khan stadium-ah fans an lo kir leh ṭan a, mahse midang khelmualah club dang fans tan inkhel en theih a ni ngai meuh chuang lo.

Season tharah erawh league match vawi thumna an khelh aṭangin mahni mual chauh ni loin, khualmualah pawh inkhel a en theih tawh dawn bawk - stadium khat tlata punkhawm erawh a la rem nghal lo mai thei.

DFL chuan thuchhuah siamin, "A hmuna inkhel entu awm theih dan hi sorkar lam nen ruahmanna siam a la ngai zel. Tun dinhmunah chuan mikhual team lamin ticket pek chhuah theih zat aṭanga chhutin 5% an chang ve ang.

"Inkhuahkhirhna hi hlih a nih a, tun hma anga kalphung pangngai a ni leh hunah chuan 10% ah a kaisang leh nghal ang," tiin an sawi a, a lan dan chuan season tirah chuan stadium khatin entu an la awm dawn lo.

Bundesliga season thar hi August 13 aṭanga khelh ṭan tur a ni. Champion lai Bayern Munich chuan an match hmasa berah Borussia Moenchengladbach an len chilh ang.