Everton hlawhtlin pui ka tum - Benitez

Rafael Benitez chuan Everton ṭantu tam takin thinlung takin an la pawm thei lo tih a hria, fans rilru hneh theih nan Toffees chu hlawhtlinna chanpui ngei a tum thu a sawi chhuak.

Spanish manager hian tun hmain Liverpool a lo enkawl tawh. Reds ang bawka Merseyside club Everton tan chuan an hmelma club manager hlui hi thinglung taka lo pawm a harsa ang tih pawh a chiang.

Kum 61 mi Benitez hian 2007 khan Merseyside Derby an khelh zawhah Everton chu 'Club tenau' tiin a lo sawi tawh. Everton a zawm hnuah Spanish manager chuan, "Kha thil kha chu hun rei tak liam ta a mi a ni.

"Manager i nih chuan i club tan hna i thawk tur a ni a, i ṭan viau tur a ni bawk. Tunah chuan thawnthu a danglam tawh, Everton tan hian theihtawp ka chhuah dawn, season hmasa an thlen chin aia ṭha kha thlen kan tum ang," tiin a sawi.

Benitez hian Carlo Ancelotti hmun ruak a luah - Italian manager hi tun hma lama a lo enkawl tawh Real Madrid-ah a kir. Season hmasa khan Everton hi Premier League-ah 10-na a nihpui, player a neih dan chhut chuan hei aia sang thei tur hi niin an lang.

Chelsea leh Newcastle United pawh enkawl tawhtu Benitez chuan, "Ka bul hnaia Everton ṭantu awmte chuan min thlawp ṭha hle a, anni hian hnathawh pawh min ti châk zual. Ka laka duh leh beisei ang an neih chu pek ngei pawh ka tum.

"Everton nen inbiakna kan neih tirh khan, club hian a thil tum chi hrang hrang min hrilh, sang tak thlen duh an nih avangin kei pawhin phur takin ka zawm. A ṭha thei ang bera hnathawh ka tum," tiin a sawi.

Premier League club bakah Real Madrid, Valencia, Napoli leh Inter Milan te a enkawl tawh avangin tawnhriat a nei ṭha a, nomawi pawh a chawi hnem tawh - title lak chaka tuihal Toffees tan mamawh chhanna a ni thei tura ngaih a ni.

Benitez chuan, "Senior player ṭhenkhat ka be tawh a, anni pawh hlawhtlin châk leh rilru nghet tak an ni tih ka hriatin ka lawm. Hlawhtlin ngei tumin kan bei dawn, nomawi kan chawi a nih chuan inrintawkna kan neih sa hi a sang lehzual ang," a ti.

Everton manager hi Toffees striker hlui Duncan Ferguson leh Liverpool assistant manager hlui Francisco de Miguel Moreno ten hna an thawhpui dawn a, eng ang tak nge an thlenpui dawn tih chu kan hre thuai dawn.