Haaland-a'n training a zawm

Chelsea nena sawizawm striker Erling Haaland chuan July 14, Nilaini aṭang khan Borussia Dortmund training a zawm. Norwegian striker hi training ni hmasa berah a inlan lo a, club sporting director Michael Zorc chu, "England-ah a awm tawh alawm," tiin a uang.

Dortmund hian Haaland hi chhuah an phal loh thu an tichiang tawh a, chutihrualin goal khung thei bik striker nei lo Chelsea hian lakluh an tum ruh hle. Blues tlarhmaa awm Timo Werner-a'n season liam ta khan goal 12 chauh a khung a, Olivier Giroud leh Tammy Abraham te chhuak tura sawi an ni bawk.

German club hian Haaland manah hian pound maktaduai 150 vel an chhiar a, chutihrualin Norwegian striker release clause hi pound maktaduai 65-ah a tla thla dawn tih sawi a awm.

Chelsea hian lak ngei an duh a, Dortmund hnenah Haaland lei dilna pawh an thehluh tawh. Amaherawhchu German club hian Blues dilna hmasa ber hi an hnawl a, Roman Ambramovich leh a hoten sum ṭhahnem zawk an thehchhuah ngam a ṭul ang.

Kum 20 mi Haaland chuan, "Ni khatna, zin kawng zawh turin ka inpeih," tiin twitter-ah a ziak a, Norwegian striker hian Borussia Dortmund kawr hi a ha chhunzawm dawn nge Chelsea tan a khel dawn tih hi hriat a châkawm ta hle.