UEFA-in inkhelh hun sawn

Europe-a football thuneitu sang ber UEFA chuan coronavirus vangin a hnuaia inlena zawng zawng inkhelh hun a sawn vek a, chung zingah chuan Champions League leh Europa League pawh a tel. March 20-a Europe club-te inelna fixture pawh (tie-draw) hun pawh sawn a ni bawk.

March 12, Ningani zan khan Europa League last 16 first leg khelh a ni a, match riat khelh turah match hnih Getafe vs Inter Milan leh Roma vs Sevilla te an khel thei lo. Second leg hi March 19, Ningania khelh tur a ni a, UEFA chuan an sawn thu an puang.

Champions League-ah March 17-18 hian second leg khelh tur match li a awm dawn a; heng inkhel pali Bayern Munich vs Chelsea (3-0), Barcelona vs Napoli (1-1), Man City vs Real Madrid (2-1) leh Juventus vs Lyon (0-1) te inkhelh hun sawn vek a ni. 

UEFA hian March 17-18 a khelh tur Youth League quarterfinal pawh inkhelh hun a sawn a, inkhelh hun tur erawh la hriattir leh tur a ni. Europe-a football thuneitu sang ber UEFA chuan a hnuaia ram 55 te nen March 17, Thawhlehni hian coronavirus chungchang an ngaihtuah ang. 

An thu ngaihtuah tur zingah hian 2020 UEFA European Football Championship pawh a tel a, inelna hi ruahman danah chuan June 12 - July 12 inkara neih tur niin khawpui 12 - London, Munich, Rome, Baku, Saint Petersburg, Budapest, Bucharest, Amsterdam, Bilbao, Glasgow, Dublin leh Copenhagen-ah te khelh a ni dawn. Amaherawhchu, coronavirus vangin Euro 2020 hi nakkum lamah an khelh a rinawm ta zawk.