Tokyo Olympic 2020 : India aiawhin mi 228 feh chhuak dawn

Indian Olympic Association (IOA) president Narinder Batra chuan Tokyo Olympic-ah India chuan infiammi 228 a tirh tur thu a sawi chiang ta, infiamna khawmpui liana India-in ram aiawh a tirh hnem ber ṭum a ni ang.

Batra chuan, "Infiammi kal chhuak tur zinga 119 chu athletics huanga mi an ni dawn. Mipa 67 leh hmeichhia 52 an ni a, tun ṭumah hian medal dawn theihna chi hrang 85-ah kan inlan dawn," tiin a sawi.

Olympic hnuhnung ber Rio Olympic 2016-ah khan India hian infiammi 117 a tir chhuak a, a hunlai chuan India-in Olympic-a infiammi a tirh hnem ber a ni, tun ṭumah hian a khum chiang dawn hle.

Brazil khawpuiah khan India hian a pumpuiah silver leh bronze medal pakhat ve ve a la, Japan khawpuiah medal eng zat nge a lak dawn chu kan hre thuai dawn. Tokyo Olympic hi July 23 aṭanga August 8 chhunga neih tur a ni.

Lalremsiami Hmar
Mizo nula Lalremsiami Hmar chu Tokyo Olympic-ah a inlan dawn a, hmeichhe hockey team tan a khel ang. Siami hi kum naupangte ni chungin India player pawimawh a ni phak a, harsatna lian tak a nei a nih loh chuan Japan ramah pawh a inlan ngei ang.

Rio Olympic-ah khan Lalruatfeli Hnialum chu India hmeichhe hockey team-ah (standby) a lo tel tawh. Thal kah thiam C. Lalremsanga chu 1992 Barcelona leh 1996 Atlanta Olympic-ah khan a lo inlan tawh bawk.

MC Mary Kom
Tokyo Olympic hawnna neih a nih hunah hian India hnam puanzar kengtu (flag bearer) pahnih an awm dawn. Mipa hockey captain Manpreet Singh bakah MC Mary Kom pawhin flag a keng ang. Manipuri boxer hian London Olympic-ah khan bronze medal a lo hlawh chhuak tawh.

Manpreet Singh
India mipa hockey captain Manpreet Singh chu Tokyo Olympic hawnna neih a nih hunah India hnam puanzar kengtu (flag bearer) a ni dawn. Pargat Singh (1996 Atlanta Olympics) hnuah Manpreet hi hockey player zinga India flag bearer ni leh thei hmasa ber a ni.