Premier League ṭan a hnai: Eng nge kan beisei dawn?

Copa America khelh zawh a ni a, Euro 2020 pawh kan mangṭha fel tawh - football fan-ten transfer bazar leh league lam an hawi leh ṭan tawh a, Premier League chu ngaihven langsar a ni.

Khawvela league ngaihven hlawh ber anga chhal ngam Premier League hi August 13-ah khelh ṭan a ni dawn a, match hmasa ber hi zan dar 12:30-ah Arsenal leh Premier League kai thar Brentford ten an khel ang.

August 13 zanah hian match khat bak en tur a awm dawn lo a, August 14 zanah match sarih lawih a awm dawn thung - club langsar a ruala inkhel tur an awm lo erawh football fans tan lawmna tham a ni.

British awpna hnuai aṭanga India zalenna ni, IndiaIndependence Day - August 15 zanah match hnih a awm ang a, zan thum chhung chu a zawnin Premier League match en tur a awm dawn tihna a ni.

Big Six
Arsenal-in khualmualah Brentford an lenchilh dawn a, khualmuala inkhel tur ni mah se an hmachhawn tur team hi Premier League kai thar an nih avangin point thum nena season bul ṭan tura beisei an ni.

Manchester United-in August 14 zan dar 5:00-ah Leeds United an mikhual dawn a, hei hi en châkawm chu a ni - zan dar 7:30-ah Chelsea an inlan ve leh thung ang a, Patrick Vieira kaihhruaina hnuaia khel tur Crystal Palace an mikhual ang.

Everton hi Big Six zinga chhiar tel ni lo mah se Liverpool boss hlui Rafael Benitez chu an coach a nih tak avangin ngaihven an hlawh a, August 15 zan dar 7:30-ah vek Southampton an mikhual ang a, Leicester City-in hemi rual hian Wolver-hampton Wanderers an lo mikhual dawn bawk a ni.

Liverpool-in August 15 zan dar 10:00-ah kai thar Norwich City an lenchilh dawn avangin hna a awlsam nghal anga ngaih theih a ni a, August 15 zan dar 9:00-a Tottenham Hotspur leh Manchester City inkhel tur hi Big Six zinga team intum nghal tur an nih avangin ngaihven a hlawh khawp ang.

Fans an kir dawn
Premier League fan-te tana chanchin lawmawm chu khelmuala fans an kir leh thei ta tur hi a ni a, television lama inkhel entu tan pawh inkhel en a nawm phah sawt tura ngaih a ni.

Season tawp lamah khan fans 10,000 emaw stadium-a leng chin 25% tia dan siamin fan-ten inkhel an en thei a, mahse, UK sorkar chuan July 19-ah chuan UK huam chhunga Covid-19 vanga inkhuahkhirhnate chu a thlah dul tawh tur thu a sawi.

UK prime minister Boris Johnson chuan outdoor emaw indoor emaw pawh ni se, infiamna hmuna punkhawm khapna dan an neihte chu an hlih vek tur thu a sawi a, stadium khatin fan-ten inkhel an en thei dawn tihna a ni.

Premier League inkhelte hi Zirtawpni zan inkhel an nih chuan dar 12:30-ah an khel ang a, Inrinni zanah dar 5:00, dar 7:30 leh dar 10:00-ah te match a awm a nih chuan khelh ṭhin a ni ang a, Pathianni zan bik chu dar 6:30 leh dar 10:00-ah a ni ang a, kar laihawla match a awm chuan zan dar 12:15 leh 12:30-ah khelh ṭhin a ni ang.

Dan thar chu
Football khawvela dan duangtu International Football Association Board (IFAB) lamin an lo rel tawh angin ball-in kut a tawh fuh zawng zawng chu handball-ah chhiar a ni vek dawn lo.

Chumi awmzia chu goal khungna kawnga tihpalh thil thua kuta ball tawh fuh palh chu handball a ni tawh dawn lo tihna a ni a, chutihrual chuan kut hmanga goal khung emaw, 'accidental handball' kaltlanga rang taka goal khung a nih chuan pawm a ni chuang lo ang.

Season hmasa khan lua hliam tuar player an awmin, substitution siam zawh vek tawh pawh ni se, substitution pahnih siam theihna dan siam a ni a, a ṭul dan a zira tun season-a hman tlang theih tura ruahman a ni.

Premier League chuan hei hi tun season-ah a hmang chhunzawm dawn a, player zingah lua hliam tuar an awm chuan, substitution hman zawh pawh ni se, lakchhuahin, an aiawh tur luhtir a ni thei dawn tihna a ni.

VAR dan thar
Season hmasaa video assistant referee (VAR) in sawiselna a tawk nasa a, a bik takin offside en nawn a nihin hotea ngaihah pawh an 'line' rin hmangin offside an puang leh ṭhin.

VAR hmanga offside en ṭhenkhatah chuan player zak lo kau deuh leh ke zungpui lo lawr hret thlengin offside-ah ham a ni ṭhin a, hei hian football hlutna a tihniamah tam tak chuan an ngai.

Hetiang a nih avang hian Premier League chuan VAR hmanga offside ennawn a nih pawhin tlema line lian deuh hlek hmanga rin turin an ti dawn a, hei hian offside 'tight' lutuk an ham ṭhin chu a tizia tura ngaih a ni.

VAR-in offside a en dan thlir nawnna hi June thlatir khan Premier League thuneitute chuan an lo nei tawh a, he dan thar hi tun season aṭangin an hmang ṭan dawn ta a ni - footballer tam tak chu an thaw huai ang.