Hliam nei sain ka khel - McGregor

Conor McGregor chuan UFC 264-a Dustin Poirier laka a tlawm hma khan a kerekah hliam a neih sa thu a sawi a, "Kerek hliam nei chungin fight kha ka hmachhawn a ni," a ti.

Kum 33 mi fighter hian hliam a neih avangin fight hmachhawn loh mai a rilruk hman thu a sawi - Irish fighter hian a ke ruh tliak vangin round khatnaah Pathianni zing khan Poirier a ngam lo.

Poirier nena an in fight-ah hian McGregor hian a tawlh hnun pahin a ke chu a chhep sual niin a lang a, hetah hian a ke ruh a tliak - Irish fighter hian fight ṭantira a ke a hman tam dan ngaihtuah chuan Poirier a hmachhawn hmaa hliam nei sa anga a insawi hi awih a harsa hle.

McGregor chuan, "Engtiklai tak khan nge hliam ka tawrh chiah tiin mi tam takin min zawt a, an duh chuan UFC president Dana White, UFC emaw UFC head doctor, Dr. Jeffrey Davidson an zawt thei ang.

"Octagon-ah khan hliam nei sa chungin ka lut tih an hria. Inhnuhdawh mai pawh kan sawi ri a, invenna tel loa practice ka nei ṭhin khan hliam min neihtir a ni," a ti a, a hliam vanga training neih a harsat thu a sawi bawk.

McGregor hi a hliam vang hian zai a ni tawh a, kum 32 mi fighter chuan, "Kar ruk vel chu inenkawl a ngai dawn a, chumi zawhah inbuatsaihna kan ṭan lehnghal ang," a ti a, chawlh mai a la tum lo hle.

Irish fighter hian a khup aṭanga a ke rek thlengin 'titanium rod' chu a keah phum a nih thu a sawi a, "Terminator 2-a Arnold Schwarzenegger ang mai khan tih tliah rual loh titanium 'ke' ka nei tawh dawn a ni," tiin fiamthu a thawh zui.