Olympic khel tur Djokovic

Tennis world number 1 Novak Djokovic chuan Tokyo Olympic a khelh tur thu a tichiang a, infiamna khawmpui lian hmachhawn tura tih fel ngai tur ang chu a ti fel tawh - Japan ramah kan hmu ngei dawn.

Kar hmasa khan Djokovic hian Wimbledon title a la, Grand Slam nomawi 20 a chawi tlin hnu hian '50-50' tiin Tokyo Olympic chungchang a sawi a, a dinhmun a sawi chiang thei lo; tunah erawh a tichiang ta.

Serbian tlangval hian season kal laiah Australian Open, French Open leh Wimbledon title a la vek - Olympic gold medal leh US Open champion a ni zui thei a nih chuan 'Golden Slam' a ni ang.

Golden Slam tur chuan, season khat chhungin grand slam pali bakah Olympic gold medal lak tel a ngai. Mipa tennis player zingah hetiang ti thei hi an la awm ngai lo a, tunah Djokovic-a'n tih theihna hun ṭha a nei mek.

German hranghlui Steffi Graf-i khan 1998 khan 'Golden Slam' hi a lo hlen chhuak tawh a, hmeichhe player zingah pawh ani chiah hi hetiang dinhmuna ding thei hi a la ni - player ṭha fal bik nih a ngai a, vanneih tel a ngai bawk a ni.

Tokyo Olympic-ah hian Djokovic tan nomawi chawi theihna remchang a inhawng dawn. Roger Federer leh Rafael Nadal te chuan Olympic an khelh loh tur thu hi an lo sawi tawh a, anni pahnih hi chuan 'Golden Slam' beiseina an nei tawh lo.