English player hmusittute an man

Euro 2020 final-a England tana penalty pet goal lotu Marcus Rashford, Bukayo Saka leh Jadon Sancho te an vun rawng behchhana diriamtu ṭhenkhat chu man an ni tawh a, an mi man zat hi mi panga an ni.

Manchester United striker Marcus Rashford, Arsenal forward Bukayo Saka leh Red Devils player thar tur Jadon Sancho-te hian Italy nen Euro champion an zawnna inkhelah penalty an pet goal lo a, England an tlawm phah.

Fans tam takin an chak loh hi hrethiam loin an chak loh chhanah player pathum hi an puh a, online kaltlangin diriamna an tawk nasa hle - hetihrual hian player pathum hian thlawpna tam tak an hmu bawk.

He buaina chhuitu zinga mi chief constable Mark Roberts chuan, "Diriam an nihna hi pawm thiam a harsa a, hetianga diriamtu zingah hian i tel a nih chuan kan zawng hmu vat che ang a, i thiltih duhawm lo tak avangin hremna na tak pek i ni ang," tiin player pathum diriam tute chu a vau.