Fury vs Wilder III: Inhnek hun an sawn

British boxer rothap Tyson Fury leh amah chotu Deontay Wilder te a vawi thum nana an inhnek hun tur chu sawn a ni a, October 9-a inhnek tura ruahmanna siam a ni.

Boxer pahnih hi July 24 khan inhnek tura ruahmanna siam a ni a, mahse, British heavyweight boxer Fury hian Covid-19 a kai tih hmuhchhuah a nih avangin an inhnek hun tur hi an sawn.

Tunah chuan an sawn hun pawh tihchian a ni ta a, Las Vegas khawpuia fight hmuhnawm tura beisei hi boxing fan-te chuan an nghah leh hret a ngai dawn tihna a ni.

Boxer pahnih hi December 2018 khan a vawi khat nan an lo intawng tawh a, he fight-ah hian chak zawk awm loin draw result-ah puan a ni a, February, 2020 khan a vawi hnih nan an inhmachhawn.

Las Vegas khawpuia MGM Grand Garden Arena-a an inhnekah hian technical knockout hmangin Fury chu chak zawkah puan a ni a, WBC heavyweight title a hlawh chhuak zui.

Fury hian Wilder a hneh hnuah Anthony Joshua hmachhawn turin ruahmanna pawh thui tak kalpui hman a ni tawh a, mahse, Wilder-te lo inrawlhin Fury nen a vawi thum nana inhnek tura contract an neih thu an sawi.

Court lamin Wilder-a lam an ṭang a, Fury nen inhnek leh turin thutlukna an siam - a tawpah chuan Fury pawhin duhthlan tur a nei lo a, a vawi thum nan an inhmachhawn dawn ta.

Mahse, hri leng vangin inhnek hun sawn leh a ṭul a, kum 32 mi Fury chuan, "He boxer awm awl tak hi July 24-a tukdawl tawh ka chak takzet. Mahse, kan nghah leh a ngai dawn ta a nih hi.

"Eng tihsual mah neih ka tum lo a, a hma zawng aia ṭhain ka lo kir leh ang. Ocotber 9-ah kan in fight ang a, ka knockout dawn a ni," tiin kum 35 mi Wilder a hneh tur thu a sawi.

Fury hian vawi 31 fight a hmachhawn tawhah tlawm a la nei lo a, American fighter Wilder hi vawi 44 fight-a hmachhawnah vawi khat a tlawm tawh thung.