West Brom-in Johnstone lei dilna an hnawl

Premier League club West Ham chuan Championship lama tla hlim West Brom aṭangin England goalkeeper Sam Johnstone lei tum mah se Baggies chuan an dawrna an hnar a, Hammers tan sum tam zawk thehchhuah a ngai.

West Ham hian Euro 2020-a England tana feh chhuak Johnstone lei tum hian pound maktaduai 10 an theh chhuak a, mahse, Baggies lam hian an lo hnar nghal - pound maktaduai 20 tal hmuh an inbeisei.

Kum 28 mi keeper hian West Brom-ah hian kum khat dang khel turin contract a la nei mek a, Baggies manager thar Valerien Ismael chuan an player pawimawh hi nipuiah a chhuah ngei a rin thu a lo sawi tawh.

Johnstone hian England squad-a awm chhunzawm dan a ngaihtuah a, Gareth Southgate-a keeper duh zinga tel tur erawh chuan Premier League khelh a ngai thung - hei vang hian top flight club khelhna tur a zawng mek.

Hetihrual hian West Ham hian pound maktaduai 20 senga Johnstone hi lei an tum lo nia sawi a ni a, season hmasa Fulham-a loan-a khel, Paris St-Germain keeper Alphonse Areola lam an hawi nia sawi a ni - kum 28 mi keeper hi loan hmang vekin hawhchhuah theih tura ngaih a ni.

West Ham-ah hian Lukasz Fabianski chu first choice keeper a ni mek a, kum 36 mi a nih tawh thung avangin Hammers hian keeper an zawng.

Brazilian playmaker Matheus Pereira chu West Brom chhuahsan tur anga sawi a ni bawk a, Baggies hian Championship lama tlak 'man' an tuar zel dawn niin a lang.