Theihtawp chhuah a ngai - Middleton

NBA Finals khelh laiah Milwaukee Bucks player pawimawh Khris Middleton chuan tha thlah a thiang lo tih a sawi a, an tum ram thleng tur chuan match zawng zawngah theihna sang ber hlan a ngaih thu a sawi bawk.

Bucks hian Phoenix Suns lakah game hmasa pahnih an hloh, mahse tun hnaiah a zawna vawi hnih an chak ve leh tak avangin team pahnih hi 2-2 in an inhnehtawk mek - Pathianni zing dar 6:30 hian game 5 an khel ang.

Game 4 bika point 40 neitu Middleton chuan, "Season rei tak kan hmang ta, player pawh kan chau tlang tawh tih pawh a lang. Amaherawhchu kan tum ram kan la thleng lo, hmabak hlen chhuak turin tih tur kan la nei a, chawlh a la thiang lo.

"Zan lama hahchawlhna hun kan neih angte hi a ṭha thei ang bera hman a pawimawh. Court chhunga kan lut tawh a nih chuan chhuanlam siam a rem lo, chuvangin inelna a zawh hnua lawm zawk nih kan tum ang," tiin a sawi.