Leicester City-in Bertrand an lalut

FA Cup champion Leicester City chuan Southampton aṭangin left back Ryan Bertrand chu a thlawnin an lalut a, kum 31 mi defender hian kum 2023 thleng King Power Stadium-a cham turin contract a ziak.

Bertrand hian Saints tan season sarih a khel a, inelna hrang hrangah match 240 a khelhsak. English defender chuan, "Leicester ka zawm thei hi ka lawm a, he club-ah hian ka thil tum la tih hlawhtlin lohte ka tih hlawhtlin theih ka beisei. Foxes ṭantute lawmna siam turin theihtawp ka chhuah ang," tiin a sawi.

Season liam ta khan Bertrand hian Saints tan match 29 a khel a, Chelsea tana a khelh laiin Champions League, Europa League leh FA Cup nomawi a lo chawi tawh. UCL final-a Bayern Munich an hneh ṭum hian Bertrand hian bul a ṭan a, player ropui tak tia sawi tur ni lo mah se a nomawi chawi tawh hi player ṭha tam tak chawi theih loh a ni.