Man United khingpui tur Derby

Manchester United chuan season thar atana inpuahchah nan Pathianni tlai dar 5:30 hian Pride Park-ah Wayne Rooney enkawl Derby County an hmachhawn dawn. Ole Gunnar Solskjaer-a hote hian August 14 hian season thara an match hmasa berah Leeds United an mikhual dawn a, hemi hma hian friendly match-ah Derby, QPR, Brentford, Preston leh Everton te an hmachhawn ang.

European Championship leh Copa America-a inlante chawlh an pek rei hret avangin an la inlan dawn lo a, Olympic-a tel tur Eric Bailly leh Amad Diallo te chhawr theih an la ni lo.

Inhliam vanga Euro 2020 squad aṭanga inhnukdawk Dean Henderson-a'n Thawhlehni khan training a zawm tawh a, amaherawhchu Derby nen hian keeper thar Tom Heaton chu bul ṭan tura beisei a ni.

Nathan Bishop leh Tahith Chong ten loan-in Mansfield leh Birmingham te zawm dawn mah se first team training an la zawm. Rams hmachhawn tur hian tawnhriat nei ṭha Nemanja Matic leh Juan Mata bakah Alex Telles, Andreas Pereira, Mason Greenwood, Aaron Wan Bissaka, James Garner leh Shola Shoretire te an inlan a rinawm.

Jersey thar

Manchester United chuan July 15, Ningani khan season thara an jersey hak tur an tlangzarah a, an jersey thar hi 1960 chhoa club jersey entawna design a ni.

Kum 1960 chhoah Sir Matt Busby hoin Man United an che ṭha a, kum 1968-ah European Cup nomawi chawiin English club zinga Europe inelna sang bera champion thei hmasa ber an ni. George Best, Sir Bobby Charlton leh Denis Law te chu player langsar zingah an tel.

Man United jersey hi adidas kut chhuak a ni a, kawr hmaah sponsor-tu thar TeamViewer a chuang a, anni hian Chevrolet an thlak ang. Man United leh TeamViewer hian kum nga atan pound maktaduai 235-in contract an ziak a, season khatah pound maktaduai 47 ($65m) a ni ang.

English club hian jersey hatu zingah Paul Pogba an hmang tel a, France international hi tun nipui transfer-ah chhuak tura sawi thawm awm mah se Ole Gunnar Solskjaer-a enkawlna hnuaia awm chhunzawm turah a ngaih theih.