2020 Summer Olympics : Mipa team squad

2020 Summer Olympics mipa inelna chu July 22 aṭanga August 7, 2021 chhung hian Japan-ah khelh a ni dawn. Ram 16 an inel dawn a, team tinah over age player pathum zel an tel thei. A hnuaia squad tarlanah hian hming zawna * awmte hi overage player an ni.

Olympic football inelnaah hian Under 23 tih ṭhin a ni a, kuminah erawh inelna sawn a nih avangin kum khatin an hrethiam a, January 1, 1997 leh a hnu lama piang chin tan a khelh theih. Olympic-ah hian champion lai chu Brazil an ni a, gold medal la ngun ber erawh vawi thum champion tawh Hunary leh Great Britain te an ni thung.

Medal duh Spain
Spain-in kum 2000 khan silver medal an la a, hemi hnu hian medal an la leh tawh lo. Kum 21 zet medal la tawh lo La Roja-in gold medal lak ngei an tum a, tun ṭumah pawh hian player ṭha an hruai tam hle. Spanish manager Luis de la Fuente chuan player langsar Dani Ceballos, Mikel Merino, Eric Garcia, Dani Olmo, Pedri, Marco Asensio, Pau Torres, Mikel Oyarzabal, Unai Simón leh Óscar Mingueza te a ko.

Euro 2020 khelh zawh taka Spain team-a player pawimawh ni pha Pedri, Garcia, Torres, Olmo leh Simon te an tel hian medal an duhzia a tichiang. Chutihrualin Barcelona 1992-a gold medal an lak hnuah pakhatna an la ni leh lo a, La Roja hi medal satliahah an lungawi lo ang, gold medal kher an duh ang.

Hetihlai hian Barcelona Ronald Koeman erawh a lawm lo. Dutch manager chuan, "Football player tan chuan nipui chhunga inelna lian pahnih khelh hi a tam mah mah a ni. Pep Guardiola khan a sawi tawh a, ka ṭawmpui," tiin rawlthar duhawm Pedri-a'n inlena hmachhawn lo zawk se a tuh thu a sawi.