Huaisen takin Milwaukee Bucks an chak
Giannis Antetokounmpo-a'n point 32 a nei a, hun tawp dawnah an chak nemngheh nan chiang takin a 'dunk'. Giannis awmna Milwaukee Bucks hian nimin zing khan Phoenix Suns chu 123-119 in an hneh.
NBA Finals khelh laiah Bucks hian best-of-seven series-ah 3-2 in hma an hruai mek. July 21, Nilaini zing dar 6:30 hian game 6 an khel dawn. Mike Budenholzer enkawl team hian hnehna an chang leh a nih chuan kum 1971 hnua a vawi khat nan an champion ang.
Thawhlehna
NBA Finals game hmasa pahnih chu Phoenix Suns khelmual Talking Stick Resort Arena-ah khelh a ni a, mualneitu lamin hnehna chang ve vein series-ah pawh 2-0 in hma an hruai fal nghal - an dinhmun a ṭha hman hle; Bucks tan beisei tur a tlem.
Mahse, game 2 leh 4 chu Fiserv Forum-ah khelh a ni a, court neitu Bucks lamin an la ve ve; team pahnih hi 2-2 in an inhnehtawk chiah. Game 5 khelhna hi Talking Stick Resort Arena a ni ve leh thung a, mualneitu an chak lo!
Game 6 khelhna tur hi Fiserv Forum a ni dawn - Bucks lamin mahni mualah ngei hnehna chang chungin nomawi an chawi thei dawn. Suns erawh thi leh dam kara leng an ni a, game 6 an la thei a nih erawh chuan anmahni mualah match hnuhnung ber an khel leh ang.
An tlawm lo
Match hmasa pahnih an chak loh hnuah Milwaukee Bucks an tlawm lo a, game 5 bikah pawh a tir lamah point 16 zetin hniam fal hman mah se an tlawm duh chuang lo, hamrik hnuhnung a rik meuh chuan point liin an sang zawk.
NBA Most Valuable Player vawi hnih ni tawh Antetokounmpo-a'n point 32 a neih bakah rebound vawi kua a la, an chak theih nan a thawh hlawk hle - Khris Middleton sawi bo theih a ni bik lo, point 29 bakah rebound vawi sarih a la.
Jrue Holiday sawi hmaih theih a ni lo cheu, kum 31 mi point guard hian hun tawp dawna team pahnih an inhnaihchilh laiin Devin Booker-a ball a chhuhsak thei a, basket an neih theih nan a ṭangkai - point 27 leh assist vawi 13 a nei hial bawk.
Power forward, 6ft 11in zeta sang Antetokounmpo chuan, "Match khat chak kan la hmabak. NBA Finals a ni a, hnehna chang tur chuan theihna zawng zawng sawr chhuah a ngai, chutiang chuan tum ṭumah hian kan ti thei," a ti.
A harsa
Regular season hmang ṭha tak Phoenix Suns tan champion tur chuan a harsa tawh dawn. An thiampuipa Booker-a'n zawna a vawi hnih nan point 40 a nei tling, basketball inelna sangah hian playoff china a chet ṭhat ber ṭum a tawng hial.
Mahse, hun pawimawh laiah ball a hloh. Point 21 leh assist vawi 11 neitu Chris Paul pawh a che fuh famkim thei bik lo, 56.6 seconds chauh awm tawhah basket neiin 120-119 chauhin an hniam a, beiseina an nei sang leh hman.
Mahse, tawnhriat nei ṭha Paul meuh pawh a famkim bik lo - hun tawp dawn 13.5secs chauh awm tawha Antetokounmpo-a'n a 'dunk' khum khan an beiseina chu tih tawpin a awm, game 6-ah thapui an thawh a ngai dawn.
Kum 36 mi Paul chuan, "A awlsam dawn lo tih hre lawk chungin kan leng lut a, kan beisei aiin a lo harsa zual. Inkhel ropui chhawp chhuak tur chuan team ṭha hmachhawn ngei a ngai, tuna mi erawh an harsa zual," tiin a sawi.
