Olympic khel tur mi pahnihin hripui an kai

Tokyo Olympic khel turin infiammi an fuan khawm mek zel a, inelna neihna tur hmun Japan khawpui an pan hma leh an thlen hnuan coronavirus an kai em, tih uluk taka endik zel a ni. Nimin tlai thleng khan infiammite thlen khawmna hmun bika awm tawh hri kai pahnih hmuhchhuah an ni.

Hri kaite hi a tirah chuan an hming leh ram puanzar a ni lo, inelna buatsaihtu lam chuan team pakhata mi an ni, an ti a, an teammate-te chu midang lak aṭanga khung hran an ni bawk - midang pawhin endikna an la hmachhawn zel ang.

Amaherawhchu, nimin tlai khan inelna buatsaihtu lam chuan hri leng kaite hi South Africa football team a mi an nih thu an sawi. South Africa Football Association chuan Thabiso Monyane leh Kamohelo Mahlatsi ten hri an kai tih an sawi.

South Africa team manager Mxolisi Sibam chuan, "Kan team aṭangin mi pathumin hri an kai, player pahnih bakah video analyst Mario Masha chuan hri a kai. Ni tin endik kan ni a, hri kaite hian harsatna erawh an nei lem lo," a ti.

Olympic kaihhnawih bika hri kai hrim hrim chu mi 15 an tling tawh, heng zingah hian media mi, contractor leh hna thawktu ṭhenkhat an ni hlawm. Endikna kalpui zel a la nih dawn avangin engzatin nge kai dawn tih erawh hriat a la ni lo.

Japan ramah hian Olympic khel tur player zawng zawng awmkhawmna tur bik siam a ni, he hmun hi inelna buatsaihtu lam chuan a him ṭha tawk a, hri leng kai awm loa in dah hran theihna tur hmun niin an sawi.

Mahse, tuna hri kai an hmuh chhuah pahnihte hi an ram aṭanga Japan an pan dawnah chuan hri an kai lo a, Tokyo an thlen tirh pawhin an kai lo - an ṭhiante pawhin an kai lo. Mahse, Olympic atana siam bik hmuna an awm hnua hri an kai hian ngaihtuah a ti thui.

Tokyo Olympic 2020 thu puangtu Masa Takaya chuan, "Hri kai an awm palh hi a pawi kan ti takzet, ram pakhat aṭanga lo kal inelna chi khat hmachhawn tur an ni, an ṭhiante dang pawh endik an ni a, tunah chuan an fihlim," tiin a sawi.

Olympic hmachhawn tur hian India pawhin infiammi 200 chuang a tir chhuak dawn. Inrinni zan khan a hlawm khatna chuan Tokyo hi an thleng a, a hlawm hnihna hian tun kar chhoah Japan ram an pan leh ang.