Milan-ah Giroud a lut fel

Chelsea striker Olivier Giroud chuan AC Milan a zawm fel a, a man zat leh contract rei zawng tarlan a ni lo - British media lam chuan Italian club hian euro maktaduai 1.2 sengin, season hnih daih inremna an ziak niin an sawi.

France international Giroud hian 2018 thlasik bazar laiin Arsenal aṭangin Blues hi a zawm, a man zat chu pound maktaduai 18 a ni. Stamford Bridge-ah a cham chhungin inelna hrang hrangah match 119 khelin goal 39 a khung.

Kum 34 mi Giroud chuan, "FA Cup, Europa League leh Champions League champion kan ni kha a ropui takzet. Blues mi leh sa zawng zawng ka khelhpui te, coach te leh club pumpui chungah lawmthu ka sawi, hun duhawm leh hlimawm a ni," tiin a sawi.

Chelsea hian season hmasa ṭan dawnah khan Kai Havertz leh Timo Werner te an nei thar, German forward pahnih an awm hnuah Giroud tan inkhelhna hmun a tlem zual sawt - league match vawi riatah chuah inkhel bul a ṭan.

Mahse, season hmasa tluan hian match 31 a khelh aṭangin goal 11 a khung, a goal khung zinga paruk hi Champions League-ah a ni a, nomawi liam tham an hlawh chhuah theih nan a thawh hlawk hle.

France tana World Cup pawh chawi tawh striker hi Milan-ah Zlatan Ibrahimovic nen an awmdun dawn, striker palian leh goal khung thei tak an ni - an kum tam deuh tawh mah se club dang tana hmachhawn châkawm lo tak an la ni ang.

Season hmasa khan Milan hi Serie A-ah pahnihna an ni, an hmelma leh elpui ni bawk Inter Milan chu point 12 zetin an phak lo - season tharah chuan Inter hi el phak an tum dawn a, inelna lian UCL lamah thlen san an tum dawn bawk.