Arsenal defender tur Ben White

Arsenal chuan Brighton & Hove Albion defender Ben White an lalut ngei dawn niin a lang ta. English defender manah hian pound maktaduai 50 an sen a ngai dawn a, chawlh a hman zawh hunah medical test a nei ang.

Kum 23 mi White hi Gareth Southgate kaihhruaina hnuaiah Euro 2020 squad-ah khan a tel, tun dinhmunah chawlh a hmang mek - media ṭhenkhat chuan Gunners a zawm dawn vang hian July 26 thleng chawlh a neih pawh a ti tawi dawn niin an sawi.

An duh takzet
Nipui bazar inhawn tirh lampang khan Arsenal hian White lak tumin Brighton hi an dawr a, a tirah chuan pound maktaduai 40 an theh chhuak - mahse lei an dilna hi a vawi khat nan hnawlsak an ni.

Mikel Arteta-a'n tlarhnung thuam chak nan White lak ngei a duh, a vawi hnih nan an dawr leh a, chu pawh hnawlsak leh a ni - an sum tawktarh zat tak tarlan a ni lo thung a, a vawi thumnaah erawh club pahnih an inrem hram.

David Luiz a chhuak a, tlar-hnung laia khel ṭhin Rob Holding leh Pablo Mari te awm mah se White hi rinrawl a ni phak ang. Tun nipui bazar chhungin Gunners hian Nuno Tavares chu Benfica aṭangin an lalut tawh bawk.

White-a chu
Brighton & Hove Albion aṭanga inzir chuak, feet ruka sang defender hian a hun hmasa lamah chuan rin a hlawh bik lo. Newport County, Peterborough United leh Leeds United-ah te loan hmangin a khel kual ve zak zak a ni.

Kum 2019-20 season khan Leeds hi Championship-ah a champion pui a, season hmasa khan a club pangngai Seagulls tan Premier League match 36 khelin rinrawl a ni, a khelh ṭhat bakah hma hun eng tak a neih avangin nikum khan season li daih contract an ziahpui hial.

Tlarhnung lai (ding lam) a khel thei White hi tun nipui bazar bikah chuan Arteta-a'n a player lak duh ber nia ngaih a ni. Season hmasa lama beisei phak lo Arsenal hian goal khungtu lam aiin a venghim thiam lam an ngaihven hmasa tihna a ni.

Bellerin out?
Ben White an la dawn tih a chian rualin Hector Bellerin erawh a dinhmun a chiang lo. Spanish defender hian 2023 thleng cham turin Emirates Stadium-ah contract a nei mek a, mahse beisei anga hmun nghet a chan loh bakah chona thar hmachhawn a châk niin an sawi.

Kum 26 mi Bellerin hian 2014-15 season aṭang khan Gunners tan Premier League a khel phak. North London club tan hian league match 183 khel tawhin goal riat a khungsak tawh, a lakah beiseina nei sang mah se tun hnaiah beisei a phak lo.

Arteta-a'n squad tih danglam a tum viau, defender Bellerin hi chhuak thei langsar zinga mi a ni a, hetih lai hian Belgian midfielder Albert Sambi Lokonga chu Anderlecht aṭangin an lalut fel hnai thung. Quarantine hun a zawh hunah engkim ziah fel a ni ang.