Arteta leh Gerrard enkawl team inhnehtawk

Premier League season thar inbuatsaih turin Arsenal chu Scotland-ah an inkhulh mek. Inrinni zan khan Mikel Arteta naute hi Scottish champion Rangers nen inkhelin 2-2 in an inhnehtawk - Steven Gerrard enkawl team lakah Gunners lamin si phurh vawi hnih an sut hram.

Rangers hian Leon Balogun (14') leh Cedric Itten (75') te hmangin vawi hnih hma an hruai. Mahse, mikhual Arsenal hian an defender thar Nuno Tavares (23') leh Eddie Nketiah (83') te hmangin an sut ve ve a ni.

Player thar Tavares khelh danin Gunners ṭantute a ti lawm ang, an captain Pierre-Emerick Aubameyang-a'n goal khung theih ngeia tur a ṭhelh tlauh tlauh erawh season thar ṭan hma ngeia a insiamṭhat a ngai ang.

Nicolas Pepe-a'n goal khung lo mah se a inkhel a hmuhnawm, pound maktaduai 72 man forward hi match hmasa zawkah hmuhnawm taka a lo khelh tawh bawk avangin Arteta tan lawmna tur a ni.

Arsenal hian season thar inbuatsaih nan - Inter Milan, Chelsea leh Tottenham te an la hma-chhawn leh ang. Season thar an league match hmasa ber atan August 14-ah kai thar Brentford nen an inkhel ang.

Player Inlan
Arsenal:
Okonkwo, Cedric Soares, Nuno Tavares, Pablo Mari, Holding, Elneny, Partey, E. Smith Rowe, Pepe, Balogun, Aubameyang.
Subs: Bellerin, Tierney, Lacazette, Willian, Maitland-Niles, Chambers, Nelson, Willock, Nketiah, Kolasinac, Hein.

Rangers:
McGregor; Tavernier, Balogun, Goldson, Bassey; Lundstram, Davis, Kamara; Hagi, Defoe, Roofe.
Subs: McLaughlin, Itten, Simpson, Patterson, Jones, Wright, Kelly, Edmundson, Hastie, Mayo, Arfield, Middleton.