Germany-in khelmual an chhuahsan

Germany Olympic football team chuan Hunduras nen an inkhelh ṭumin an defender Jordan Torunarigha-a'n vun rawng vanga hmuhsitna a tawh avangin inkhelh zawh hma minute nga a la awmin khelmual an chhuahsan.

Olympic inelna atana inbuatsaihna hi Inrinni khan Japan-ah khelh a ni a, entu awm loa khelh niin minute 30-in ṭum thum khelh a ni. Honduras hian goal an khung hmasa a, FC Augsburg defender Felix Uduokhai hmangin Germany hian hun tawp dawn hnaiah an sut a, hemi zawh hnu lawk hian vun rawng hmusitna hi a thleng.

Germany coach Stefan Kunz chuan, "Kan player zinga pakhatin vun rawng hmusitna a tawh avang-in kan khelh zui a rem lo," tiin thutlukna an siam chhan a sawi.

Honduras player zinga miin Torunarigha lakah hian ṭawngkam mawi lo a hmang a, hei hi Germany lamin an hrethiam thei ta lo a ni. Kunz chuan, "Torunarigha chet dan ka hmuh a bulah ka tlan nghal a, vawi hnih a tawhna a nih avangin kan chhuahsan nghal. Honduras squad kan bench bulah rawn kalin ngaihdam a rawn dil a, kan boruak chu a fel e," tiin a sawi.

Nikum February thla khan Hertha Berlin defender Torunarigha hian DFB-Pokal an khelh ṭumin Schalke ṭantute lak aṭangin vun rawng hmusitna hi a lo tawng tawh a, German football thuneitute chuan Schalke hi €50,000 an chawitir.

Tun hnaiah vun rawng hmuhsitna hriat tur a awm zeuh zeuh a, Euro 2020 final-a penalty hlahtu England player Jadon Sancho, Marcus Rashford leh Bukayo Saka te chu a langsar deuh a ni.

Olympic football inelna hi July 21 leh August 7, 2021 chhungin Japan-ah khelh a ni dawn a, Germany hi group D-ah Brazil, Ivory Coast leh Saudi Arabia te nen an awm ho.