Australian Grand Prix an tawp rih

Formula 1 season ṭan a ni dawn a, harsatna awm loin Australian Grand Prix tlan tum ni mah se chawpchilh taka tih tawp leh hnuhnawh a ni. Ningani khan team inlan tur McLaren team zinga mi chu coronavirus a kai tih hriatchhuah a ni.

Ruahman dan chuan Zirtawpni leh Inrinniah tlan chhinna an nei ang a, inelna tak chu Pathianniah neih a ni ang. Nimin khan inelna hi chiang taka an ṭhulh thu puan la ni lo mah se Ferrari driver Sebastian Vettel leh Alfa Romeo driver Kimi Raikkonen te chu an haw nghal daih a, inelna tak an neih a rinawm loh.

Melbourne Park-ah hian entu awm ngei chunga intlansiak neih tum a ni a, team-te pawh inelna hmun turah hian an thleng tawh. Amaherawhchu, McLaren team zinga miin endik a nih hnuah hri a kai ngei tih hmuhchhuah a ni.

McLaren team hian an team member 14 chu an dah hrang zui nghal, heng an dah hrante hi hri kai nena awmkhawn hnai deuh bikte an ni; team hi inhnukdawk zuiin midang pawhin inelna an hmachhawn dawn bik ta lo.

Season bul ṭanna Australian Grand Prix an buai a, kar leha tlan tur Bahrain Grand Prix pawh entu nei loa tlan tura tih ni mah se a dinhmun a chiang ta chuang lo, inelna hi chawpchilh tak pawha 

ṭhulh theih a ni.