Friendly match - Club lianten chak an harsat
Europe club lianten season thar atan training an ṭan leh tawh a, friendly match an nei chho zut dawn. Kar liam ta friendly match khelhah Bayern Munich, PSG, Borussia Dortmund, Tottenham Hotspur leh Arsenal ten chak hmel an hmu lo.
Premier League chu August 13 zan aṭangin khelh ṭan a ni dawn a, zan dar 12:30-ah kai thar Brentford-in Arsenal an mikhual ang. Kum dang ang thoin season ṭan nan Community Shield hman a ni ang a, August 7 zan dar 9:30-ah league nomawi chawitu Manchester City leh FA Cup champion Leicester City te an inkhel ang.
Bundesliga pawh August thla laihawl aṭang thoin ṭan a ni dawn a, August 13 zan aṭangin khelh ṭan a ni dawn. Chutihrualin league ṭan hma hian DFB Pokal first round khelh tur a ni a, German Cup hi August 6 zan aṭangin khelh ṭan a ni dawn.
Ligue 1 inelna erawh August 8 aṭangin khelh ṭan a ni dawn a, hemi hma hian Trophee des Champions khelh a ni dawn. England-a he inelna tlukpui chu Community Shield a ni a, Ligue 1 champion Lille leh French Cup champion PSG te an inkhel ang.
Dortmund-in Bochum an hneh lo
Borussia Dortmund chu Inrinni khan VfL Bochum nen MSV Arena, Duisberg-ah an inkhel a, Bundesliga kai thar Bochum hi 3-1 in an chak. Team pahnih inkhelhna friendly match hi Cup der Traditionen tih a ni. Inelnaah hian team pathum tel tura tih a ni a, Duisburg player pathumin Covid-19 an kai avangin Dortmund nena inkhel tur chu ṭhulh a ni.
Hri leng avang hian Dortmund leh Bochum inkhel tur hi minute 45 chhung atana duan chu minute 90 atan pawhsei a ni. Entu 10,395 hmaah Bochum-in Novothny, Ganvoula leh Bockhorn te hmangin second half-ah goal an khung a, Dortmund tana Pasalic-a goal khungin result a ti danglam pha lo. Dortmund hian season ṭan hmain Athletic Bilbao (July 24) leh Bologna (July 30) nen friendly match an khel leh ang.
Nagelsman hnuaiah Bayern an chak lo
Inrinni zan khan MS Technologie Arena-ah FC Cologne leh Bayern Munich te an inkhel a, freindly match-ah hian Cologne 3-2 in an chak.
Inkhel chu
Bavarians tan coach thar Julian Nagelsmann hnuaia an match hmasa ber a ni a, official match ni lo mah se chak loin bul an ṭan. Bayern-in Armindo Sieb (6') hmangin hma an hruai a, Jan Thielmann (20') leh Mark Uth-a goal ropui hmangin Cologne-in an lehthal.
German champion hian Joshua Zirkzee hmangin minute 34-naah siphurh sut mah se Cologne tan Uth-a'n minute 56-naah chakna goal a khung.
'Nagelsball'
Bayern player-te an la kim lo chungin Nagelsmann hnuaiah Bavarians khelh dan a danglam dawn tih a hmuh theih. German champion tana bul ṭantu zingah rinrawla tel pha tura ngaih chu defender thar Dayot Upamecano chauh a ni a, heti chung hian Bavarians-in passing game ṭha tak an khel.
Amaherawhchu Bayern tlarhnung a pawp a, defence laia inkawp Upamecano leh Chris Richards te an inkawp rem lo. Cologne tana Uth-a goal khung hi chu dan theih loh ni mah se goal dang pahnih chu Bayern tlarhnung pawp vangah a ngaih theih.
Hmabak chu
Bayern manager thar Nagelsmann chuan, "Match hmasa ber hi chu a danglam ṭhin. Kan squad neih dan thlir chuan kan khel ṭha a, player ṭhenkhat kha chu an khel ṭha em em a ni. Tlarhnung aṭanga khelh ṭan kan tum dawn a, defence laia ding te an pawimawh ang," tiin a sawi.
Bavarians hian Ajax (July 24), Borussia Monchengladbach (July 28) leh Napoli (July 31) te nen friendly match an la khel dawn a, chumi zawhah Bremer SV nen DFB-Pokal first round-ah an inkhel ang.
PSG leh Chambly inhnehtawk
Ligue 1 club langsar ber Paris St-Germain-in an training ground Ooredoo Training Centre-ah Ligue 2 club FC Chambly an hmachhawn a, 2-2 in an inhnehtawk.
July 17, Inrinni zan inkhelah PSG tan Mauro Icardi-a'n penalty hmangin minute 19-naah hmahruaina goal a khung a, Chambly-in minute 57-naah Guillaume Heinry hmangin an sut. PSG hian minute 64-naah Xavi Simons hmangin hma hruai nawn mah se Boubacari Doucoyre hmangin Chambly-in minute 89-naah siphurh an sut.
PSG tan keeper thar Gianluigi Donnarumma, defender Sergio Ramos, star player Neymar leh Kylian Mbappe bakah player ṭha engmaw zat an la khel lo. French club hian July 21 zan dar 10:30 hian German club Augsburg nen friendly match an khel ang a, July 24 zan dar 10:30-ah Italian club Genoa nen friendly match an khel leh ang.