Kane hi kan player a ni - Spurs coach

Tottenham Hotspur manager thar Nuno Espirito Santo chuan nipui transfer-a chhuak tur anga sawi Harry Kane chu an player a nih thu a sawi a, "Harry hi kan player a ni a, a bak sawi tur a awm lo," a ti!

Kum 27 mi Kane hian a club career-ah nomawi chawi a la nei lo a, champion a duh avangin Spurs chhuahsan a duh - thla hmasa khan Premier League champion Manchester City chuan English striker hi lakluh tumin Spurs an dawr tawh.

Mahse, Nuno chuan, "Harry hi kan player a nih avangin tunah rih chuan engmah sawi belh tur a awm lo. Kan team a rawn zawm leh hun ka nghakhlel tawh takzet zawk a ni.

"Khawvela player ṭha ber pawl a ni a, chu lo chu thil dang sawi tur ka nei lo," a ti a, Nuno thusawi aṭang chuan Kane a chhuah loh hmel hle.

Premier League-a striker langsar pawl ni thei reng Kane hian Euro 2020 final-a England a hruai thlen hnuah chawlh a hmang mek a, club lamah a la kir leh rih lo.

Nuno chuan, "Tun hi chu Harry-a tan chawlh hahdam hun a ni a, thil dang chu nakinah kan sawi thei ang. Ka duh ber chu hahdam takin hun hmang phawt se, a lo kir hunah kan vaiin theihtawp kan chhuah tlang leh ang chu.

"Thil tum sang tak kan nei a, a ṭha thei ang bera tih kan duh avangin Harry chungah rinna kan nghat lian hle a ni," tiin Kane chhuahtir tumna a nei lo.

Nuno chuan season hmasaa loan hmanga an hawh Gareth Bale an kawl chhunzawm loh tur thu a sawi bawk a, "Kan squad-ah a tel lo ang," a ti.

Kum 47 mi Nuno hian 2017-2021 chhung kha Wolverhampton Wanderers a enkawl a, season tawp rual khan Wolves nen hian inhriatthiam tawnnain an inṭhen - Spurs nen chona thar a hmachhawn dawn.

Tottenham hian April-a Jose Mourinho an ban hnuah a hmun ruak luah tur coach an nei thei lawk lo a, Mauricio Pochettino, Antonio Conte, Paulo Fonseca leh Gennaro Gattuso te chu inbiakna neihpui mah se an hlawhchham vek.

A tawpah Nuno an lalut a, Portuguese coach chuan, "Ka awm duhnaah tak ka awm a, ka hlim hle a ni. Kan fan-te lawmna thlen kan duh a, hlim takin kan inkhel en thei se kan duh.

"Boruak ṭha tak neih kan duh a, fan-te pawhin nuam ti taka hun an hman ka beisei. Player tinte hian nihphung an nei vek. Wolves-a ka hnathawh kha ka chhuang viau a, mahse, tunah chuan hma lam hun thlir hun a ni," tiin a sawi.

Spurs hian August 15 zanah an league match hmasa ber khelin Manchester City an mikhual dawn a, season hmasaa league match 35 a khelh aṭanga goal 23 leh assist 14 neitu Kane hian eng kawr zawk nge a hak dawn chu kan hre thuai ang.