Barca & Atletico : Griezmann & Saul An inthleng dawn?

Catalan club lar Barcelona-in indinthar an tumna kawngah thawm an nei reng a, Lionel Messi an chelh thu a chian hnua an chanchin neih langsar ber chu Antoine Griezmann a ni.

Barcelona hian leiba tluklehdingawn khat chuang an nei nia sawi a ni a, hei vang hian season tharah player hlawh atan sum an seng hnem a thiang lo - La Liga lamin dan khauh tak an nei.

Hetiang boruak karah hian Barcelona-in player engemaw zat an chhuahtir a ngai a, tuna chhuak tur langsar chu Griezmann a ni. A club hlui Atletico Madrid nen sawizawm an ni mek.

Barca hian Atletico player pawimawh Saul Niguez lakluh an duh avangin Griezmann leh Saul hi inthleng theih an beisei a, club pahnih hi an inrem hnai tawh nia sawi a ni.

Hlawh chu
La Liga-in club tinte chu an dinhmun ṭheuh zirchiangin season tin player hlawh atana an hman theih zat a bituk sak ṭhin a, hei hi sum lama club tlachhe tur ven nana tih a ni ber.

Barca sum dinhmun ṭhat lai, kum 2019 nipuiah kha chuan player hlawhah season khat atan euro maktaduai 671 an hman phalsak a ni a, mahse, kumin March-ah kha chuan euro maktaduai 348-ah a tlahniam hman.

Catalan club-in player hlawh atana sum an sen theih zat tlakhniamna chhan pakhat hi club president kal chhuak ta Josep Maria Bartomeu-a sum enkawl thiam loh vang a ni pakhat a, Covid-19 hri lengin club sum lakluh a tihhniam vang a ni bawk.

Barcelona hian season tharah player hlawh atan euro maktaduai 160 bak an sen a thiang dawn lo a, hei tak hi buaina inṭanna chu a ni ta a ni.

Messi chhehvel
Barca sum dinhmun avang hian Messi-a'n contract thar a ziah hma hauh khan La Liga president Javier Tebas chuan Barca a lo vau tawh a, "Messi an chelh dawn chuan hmun dangah hlawh an tihhniam a ngai ang," a ti.

Messi-a'n contract thar a ziak ta ngei a, kum nga dang Nou Camp-ah a cham dawn. Argentine forward hian a hlawh chu 50% ngawtin a tihniam bawk a, mahse, heti chung hian kar khata a hlawh chu £575,000 la tling tura ngaih a ni tho!

Argentine forward hi a contract hmasa hlut zawng kha euro maktaduai 500 chuang a ni a, infiamna khawvelah hei aia contract lian zawk a awm lo nia sawi hial a ni.

Mahse, Messi-a'n a hlawh a tihniam chungin Barca hi La Liga bituk chin huangah an la awm lo - Messi pawh hian contract ziak thar mah se official taka puanzar a rem lo a, player thar Eric Garcia, Memphis Depay, Emerson leh Sergio Aguero-te pawh player zingah ziah luh a la rem lo!

Tichuan...
Barca tan inchinfelna awlsam ber chu player hralh chhuah a ni a, La Liga hlawh bi tuk china awm turin hralh tur an zawng ruai a ni ber.

Catalan club hian Carles Aleñá (Getafe, €5m), Junior Firpo (Leeds United, €15m), Jean-Clair Todibo (Nice, €8.5m) leh Konrad de la Fuente (Marseille, €3m) te chu man neiin an hralh tawh.

Francisco Trincao chuan loan-in Wolverhampton Wanderers a pan tawh a, Juan Miranda (Real Betis, free) leh Matheus Fernandes (Palmeiras, contract tihtawp) te chu an chhuahtir tawh bawk.

Barca hian nipui transfer-ah euro maktaduai 30 chuang an lalut tawh tihna a ni a, an player lakluh zingah Emerson tan euro maktaduai kua an theh chhuak tih loh chu sum insenna an la nei lo thung.

Hlawh mawlh hi
Barcelona-in an president thar Joan Laporta hnuaiah indinthar hna an thawk mek a, nipui transfer-a an sum hmuh chin thlir chuan an che ṭha tih loh rual a ni lo.

Chutihrual chuan player hlawh tihniam turin player engemaw zat chhuahtir an la ṭul miau a, an player chhuahtir tawh chin ringawt pawh hian a chhawk viau ang tih lang mah se player langsar an awm loh avangin a chhawkna hi a tam tawk thei rih lo tih a chiang.

Barca hian player hlawh hnem zingah Samuel Umtiti leh Miralem Pjanic chu chhuahtir an tum bawk a, player pahnih hian kar khatah pound nuai chuang ve ve an hlawh avangin a awm lo hran lo.

Kum 27 mi Umtiti hi Lyon nen sawizawm mek a ni a, kar khatah £208,000 a hlawh avangin Ligue 1 lama kal tur chuan a hlawh a tihhniam duai a ngai dawn - Juventus-in laklet an duh nia sawi Pjanic hian kar khatah £210,000 vel a hlawh.

A hniam duai e!
Barca-in player an chhuahtir tawh aṭanga chhut chuan kum khatah pound maktaduai 15 chuang an hum thei dawn tihna a ni a, Umtiti leh Pjanic hi an chhuahtir theih chuan pound maktaduai 20 chuang an la hum leh thei ang.

Barca hian tuna chhuak tur dinhmuna ding aṭang chuan pound maktaduai 45 vel an hum dawn niin a lang a, Messi-a hlawh tihhniamna nena chhut chuan pound maktaduai 100 bawr vel ni tura ngaih a ni.

Mahse, Barca-in player thar an lalut ve tho a, pound maktaduai 100 chuang talin hlawh hi tihhniam belh a la ngai - Martin Braithwaite leh Philippe Coutinho pawh chhuahtirna tur an zawng!

Danish striker Braithwaite-a'n kar khatah £85,000 a hlawh nia sawi a ni a, Coutinho hi kar khata £146,000 hlawh anga sawi a ni - player pahnih hi an chhuak thei a nih chuan kum khatah pound maktaduai 11 vel an hum leh thei dawn tihna a ni.

A tawpah Griezmann
Barca-in player chhuak tawh leh chhuak tur aṭanga tehin an duh ang sum an la hum tawk loa ngaihna a awm a, tuna hming rawn ri chhuak chu fans ho ngainat rawn Antoine Griezmann a ni.

Griezmann hian July 2019 khan euro maktaduai 120-in Barca a pan a, kum nga chhung atan contract a ziak - mahse, French striker hian a man tam ang huin a la khel chhuak lo a, Atletico-a kan hmuh ṭhin Griezmann kha hmuhtirin kan la awm lo.

Griezmann hian season hnih chhungin Barca tan inelna hrang hrangah match 99-a khel a, goal 35 khungin assist vawi 17 a nei - Copa del Rey-ah chiah a la champion pui bawk.

Hetihlai hian a chhuahsan tak Atletico erawhin season hman zawh takah khan Barca duh loh Luis Suarez hoin La Liga nomawi an chawi a, kum 30 mi Griezmann hian thuneitute mit a tlung tawk lo.

Inthleng ila!
Barcelona-ah Messi tih loha hlawh hnem ber chu Griezmann a ni a, Atletico tan match 257-a khelha goal 133 khunga assist vawi 50 nei thei striker hian kar khatah £345,000 vel a hlawh nia sawi a ni.

France tana World Cup nomawi chawi tawh striker hian kum khatah pound maktaduai 16 chuang a hlawh tihna a ni a, beisei phak lo striker chhuahtir hi sum lama talbuai Barca tan chuan hahdamna tur pakhat niin a lang.

Barca hian Atletico midfielder Saul Niguez an lo duh tel kher si a, Atletico lam hi Griezmann nena inthlengpuiah an dil a, chutihrual chuan euro maktaduai 15 tal French forward manah hian hmuh tel an duh.

Kum 26 mi Saul hian kum 13 mi lek a nih aṭangin Atletico-ah hian hun a hmang tawh a, club dang tan a la khel ngai lo. Mahse, Spanish midfielder hian chhuah a duh thu a sawi avangin Atletico tan an lama kir châk Griezmann lawm let nana Saul chhuahtir hi thil na a ni lo - hriat tel tur erawh La Liga-ah player inthleng tawp dan a awm lo a, La Liga chuan club pahnih indawrna hi uluk takin a thlir ve reng.

Tu nge hlawk ang?
Saúl Ñíguez hian kar khatah €300,000 a hlawh mek nia sawi a ni a, hlawh hum tum Barca hian Griezmann nena inthleng hian chuti tak chuan hlawh lamah an hum hnem dawn lo niin a lang.

Chutihrual chuan Atletico hian euro maktaduai 15 hi pek tel an inhuam a nih chuan Barca tan hlawkna a ni - Niguez hi euro maktaduai 60-70 inkar man hu vel tura ngaih a ni a, euro maktaduai 100 dawnin midfielder an hralh dawn tihna a ni.

Hriat tel tur erawh Saul hi Liverpool chuan lakluh theih beiseiin an lo hel ve mek bawk a, Spain international hian Merseyside lam panin a puanthuah a tel ta thut a nih pawhin thilmak a ni lo ang.

Saul-a agent Joshua Barnett chuan, "Thutlukna siam a la awm lo. Chhuak thei a nih rualin Atletico-a cham tur pawhin chance a sang hle. Sual hian ama tana ṭha tur berin thutlukna a siam ang," tiin a sawi.