April 20 thleng tennis khel dawn lo

International Tennis Federation chuan tun laia coronavirus leng mek vangin April 21 thleng chu inelna neih loh turin a ti a, a hnuaia awm Association of Tennis Professionals (ATP) leh Women's Tennis Association (ATP) te pawhin inelna an buatsaih thei dawn lo tihna a ni.

Mipa tennis thuneitu sang ATP chairman Andrea Gaudenzi chuan, "Thutlukna siam awlsam lo tak a ni. Tournament buatsaihtu, player leh khawvel puma tennis fans tan channa nasa tak a ni. Mahse, tun dinhmunah chuan kan zavaia him tlanna leh hriselna kan ngaih pawimawh a ngai.

"Khawlvela hri len vel dan kan ngaichang reng a, boruak hian ziaawm lam pan zel se, a hma thei ang bera tennis khelh leh theih hlan kan nghakhlel hle," a ti. Inelna a awm theih loh avangin player ṭhenkhat chuan an ranking an chan dawn a, ATP chuan ranking pawh uluk taka an chhut tur thu an sawi bawk.

Mipa tennis lamah chuan BNP Paribas Open, Miami Open, Rolex Monte-Carlo Masters, Barcelona Open leh Hungarian Open te an khel thei dawn lo tihna a ni. Hard court bakah clay court season tir lam an khel thei dawn lo.

Hmeichhe tennis thuneitu sang WTA hnuaia inelna Miami, Guadalajara, Charleston leh Bogota-ah te an inkhel thei dawn lo. WTA hian April 20 aṭanga khelh ṭan tur Stuttgart leh Istanbul Open te chu an ṭhulh dawn em tih an la sawi rih lo thung.