US-ah infiamna lian ho an ti tawp lailawk

United States chuan an ram chhunga infiamna lian hrang hrangte chu thu thar a awm leh hma chuan neih tawh rih loh turin an ti a, hetianga thutlukna lian an siam chhan hi coronavirus darh zel a zualkai lohna a nih an beisei vang a ni.

Basketball inelna lian leh ngaihhlut ber NBA chuan an match zawng zawng chu khelh rih loh turin an lo ti tawh. Utah Jazz player Rudy Gobert chuan hri leng hi a kai tih hriat a ni a, player dang pawhin an kai rinna a lian hle.

National Hockey League (NHL) leh Major League Soccer (MLS) te pawhin ni 30 chhung atan an chawlh thu an puang tawh. Major League Baseball (MLB) chuan an rama ralkhel dar (national emergency) an vuak avangin an season ṭan mai tur pawh ruahman angin a kal thei bik lo.

US-ah hian an infiamna ngaihhlut National Football League (NFL) chuan season chawlh an hmang mek a, April 23 hian Las Vegas-ah 2020 Draft neih tur a ni - hei pawh hi a dinhmun a chiang tawh chuang lo. Mipa leh hmeichhia ten college basketball an khelh pawh a tawp.

NBA team Los Angeles Lakers star LeBron James chuan, "Infiamna chi hrang hrang ṭhulh a ni a, zirna in, office leh hnathawhna pawh kal theih a ni lo. Kum 2020 hian thla thum hrehawm zet a rawn herchhuahpui a, a kum hi liam thuai mai se a duhawm. Pathian zarah dam taka in awm ka duh," tiin a sawi. American tlangval James hian fans awm loa inkhelh a hreh thu a lo sawi tawh. James chuan, "Fans hi kan inkhelh chhan an ni a, an tel lo chuan engmah lo mai kan ni," tiin entu pawimawhna a hrechiang hle.