Stamford Bridge-ah Chelsea an mualpho

Chelsea-in Newcastle United an hneh ṭuma goal hnih khungtu Michy Bat­shuayi chu loan-in Bo­russia Dortmund-ah an chhuah a, Belgian striker thlak­na tura an lakluh Olivier Giroud chhawr theih a la nih loh bawk avang­­in goal khung tur an nei lo.

Stamford Bridge-ah Bournemouth tan Callum Wilson, Junior Stanislas leh Nathan Ake ten second half-ah goal khat ṭheuh an khung a, 3-0 in hnehna an chang. Cherries hian khualmuala match hnuhnung pasarihah a vawi khat nan hnehna an chang a, manager Eddie Howe chuan Premier League-a an result ṭhat ber ṭum a nih thu a sawi.

Bournemouth hian English league sang ber hi an season thum khelhna a ni a, 2015-16 season-ah Chelsea leh Manchester United te an hneh a, 2016-17 season-ah Liverpool leh Leicester te hneh lehin tun thla tir khan Arsenal an hneh leh bawk a, chung zawng zawng ai chuan tun ṭuma an chakna hi Eddie Howe chuan a ngai hlu zawk a ni.

Kum 40 mi Howe chuan, "Kan thawhrimna te, kan tumruhna te kha a ropui a, khatiang zawng zawng belhkhawm khan chak kan phu a ni. Chelsea hneh tur chuan a ṭha bera khelh a ngai a, tun hi kan result ṭha ber a ni a, kan khelh ṭhat ber ṭum a ni," tiin an result-a an lungawi thu a sawi.

Chelsea manager An­tonio Conte chuan, "Chak phu zawk an ni. Kan theih­na zawng zawng chhuah mah ila khelh an harsa em em a, 0-0 a nih lai pawh khan kan talbuai a ni. Chhuahlam siam kan tum lo a, tho chhuak leh turin hma kan la nghal ang," tiin an khingpui team a fak.

Blues-in Alvaro Mo­­rata inhliam vanga an chhawr theih loh avangin Eden Hazard chu hmatawng berah dah a ni a, Belgian winger hi a hna tharah a hlauhawm tawk lo. Chelsea-in February 5, Thawhṭan zana Watford an hmachhawn hunah Morata a la damlo a nih chuan Giroud pawhin a vawi khat nan London club tan bul a ṭan thei ang.