Sanchez-a telna United an zawr
Wembley Stadium-ah Tottenham Hotspur-in second 11 lekah Christian Eriksen hmangin Manchester United lakah goal an khung a, Mauricio Pochettino hoten an phu ang ngeiin point thum an hlawh chhuak.
Jose Mourinho-a'n tlarhma tih chak nan Arsenal aṭangin Alexis Sanchez lalut mah se attacking game an khel ngam lo a, minute 28-naah United defender Phil Jones-a'n an lamah a tihluh leh bawk avangin tho chhuak tur an awm tawh lo. Nilaini zanah Spurs-in 2-0 in hnehna an chang.
Mipui hmuh châk
Manchester United-in January thlaah an khingpui an hneh vek a, an chet ṭhat vanglai takin Alexis Sanchez an lakluh bawk avangin Tottenham Hotspur nena an inkhel hi mipui hmuh châk a ni.
Spurs erawhin inkhelh ṭan hma darkar hnih la awmin Paris Saint-Germain aṭangin Lucas Moura an lalut fel a, Brazilian winger chhawr theih ni lo mah se Danish midfielder Eriksen chu damlohna aṭangin a rawn let a, chu chu phurna tham a tling thung.
Sec 11-ah a zo
Wembley Stadium-ah inkhel an ṭan a, Spurs-in ball an vawrhlut nghal a, Harry Kane leh Dele Alli te thawhrah sengin Eriksen-a'n second 11-na lekah a pet goal. Sum tam tak senga din United team tan thawhchhuahna hun awm mah se Spurs thuhnuaiah hun pumin an awmah a ngaih theih.
Minute 28-naah Eriksen bawkin mual ding lama Kieran Trippier chu hmu fuhin English right back cross chu United defender Phil Jones chuan keeper David de Gea tana dan rual loin a pet goal a, English defender Jones hi goal hnih an chhuahna kawngah mawhphurtu a ni.
Spurs-in match ruk chhung goal chhuah tawh lo United an nawr ngam a, goal hnih an khung. Mualneitu player-te an thawkrim a, 116 km zet an tlan a, mikhual aiin 8 km zetin an tlan tam zawk. Hei chauh hi ni loin huaisen taka an khelh theih nan mipui an thawk ṭha a, Wembley Stadium-ah mipui 81,978 pung khawmin Premier League-a entu tam ber ṭum a ni.
Sanchez a bo
Alexis Sanchez-a'n United tana a match hmasa berah League Two club Yeovil Town a hmachhawn a, vawi hnih assist neiin man of the match-a thlan a ni.
Chilean forward hian league match hmasa berah United nena intiat tawk Tottenham Hotspur a hmachhawn a, Arsenal forward hlui hian Spurs defender tan buaina a siam lo. Alexis hian vawi khat pawh an khingpui goal-ah a pet lo a, Spurs penalty area-ah vawi hnih chiah ball a khawih.
Mawhphurtu Mourinho
Manchester United-in player an lakluh nana an sum sen ngaihtuahin eng stadium-ah pawh zawr tur an ni lo a, amaherawhchu Alexis kawl chungin Spurs lakah an mualpho. Mourinho-a'n club lian a hmachhawn apianga goal venhim thupui bera a hmang ṭhin chu United mualphona chhana ngaih theih a ni.
United manager Jose Mourinho chuan, "Kan lamah ho lam takin goal kan chhuah nghal a, second rei lote chhunga goal kan chhuah khan nghawng lian tak a nei a, Spurs-in an duh danin an khelh theih phah a ni. Goal hnihna a luh kha chuan engkim a zo a ni," tiin goal an chhuah hma chu chhuanlamah a hmang.
Tottenham manager Mauricio Pochettino chuan, "Kan tum chu ṭan phat aṭanga rilru zawng zawng pek a ni a, hma taka goal kan khung thei khan inkhel kal hmang thui tak a hril a ni. Point thum hian a sang palia awm turin min pui a, kan player thar Lucas Moura pawhin kan khelh dan kha hmuh nuam a ti khawp ang," tiin an result-ah a lungawi thu a sawi.
