Manchester City-in nomawi an hnaih zel

Manchester City-in Etihad Stadium-ah West Brom 3-0 in an hneh a, anmahni hnaih bertu Manchester United an chetsual avangin match 13 chauh khelh tur awm tawhah point 15-in hma an hruai ta.

Nilaini zan inkhelah hian City tan Fernandinho-a'n minute 19-na lekah a khung a, second half-ah Kevin de Bruyne (68') leh Sergio Aguero (89') ten an khung belh leh bawk.

Pep Guardiola hoten hian an mualah inkhel an thunun a, 74% zet ball possession an nei a. Mikhual Baggies hian Liverpool aṭanga an hawh Daniel Sturridge-a'n minute 88-naa khelmual a rah hnuah chiah City goal-ah an pet.

Tun hnaia contract pawtsei thar De Bruyne chu City tana goal khungtu ni ringawt loin conductor ṭhain zaipawl hneh sawh taka a kaihhruai ang chiahin awmze neia Pep Guardiola hoten an khelh theih nan midfield aṭanga hneh taka team kaihruaitu a ni.

Manchester City manager Pep Guardiola chuan, "Kan khel ṭha, chak kan phu a, point thum kan hmuh belh. Season tluanin Kevin de Bruyne a khel ṭha filawr a, Kevin anga player ṭhain bul an ṭan tawh chuan midangin an zui ṭhin a ni," tiin chak an phu thu a sawi.