Hmel thar Republic Veng leh MSVT inlan hun
Zanin dar 7:30 hian Hawla Indoor Stadium, Republic Vengthlangah Mizoram Super League khelh chhunzawm a ni dawn a, club thar Republic VR4 leh Mission Vengthlang Hollow an inhmachhawn ang.
Season hmasa khan Hollow hi Chanmari hming puin an inlan a, beisei an phak lo. Table-ah a hniam ber dawt niin MSL khelh chhunzawm tur hian playoff an paltlang leh thung.
MBBA hriatpuina hnuaiah MSL club ten an behchhan veng an thlak thei a, Hollow hi basketball ngaina veng Mission Vengthlang hminga inlan tawh tur an nih avangin an phur dawn.
Republic VR4 tan MSL match hmasa ber a ni dawn a, Aizawl District champion hian Zarkawt BCA enkawl tawhtu R. Liansangpuia chu coach atan an nei a, veng chhung player paruk - R. Darliansanga, C. Lalchhandama, K. Vanlalmuana, TC Lalnunmawia, T. Lalhriatzela leh Zomuanpuia bakah inlena neihna hmun Republic Vengtlang tlangval Lalchhandama an kawl avangin ṭantu an nei ṭha ang.