Transfer tawp niah $um a sur!

Nimin zing dar 4:30 khan England-ah January transfer bazar a tawp a, Premier League club ten transfer tawp nia an sum sen hnem ber ṭum an tawng–transfer tawp nia an sum sen zat ringawt hi pound maktaduai 150 a ni.

Premier League club ten January-a sum an sen zat ringawt hi a vaiin pound maktaduai 430 a ni a, transfer tawp nia player manto ber chu Pierre-Emerick Aubameyang a ni–Arsenal chuan Borussia Dortmund aṭanga Gabonese striker lalut tur hian pound maktaduai 56 an theh chhuak.

Transfer tawp nia player manto langsar zingah Lucas Moura chuan pound maktaduai 23-in Tottenham Hotspur a zawm a, Olivier Giroud leh Andre Ayew te chuan Chelsea leh Swansea City chu pound maktaduai 18 ve vein an zawm bawk.

Hmanah chuan...
Kum 2011 khan Premier League club ten January transfer tawp nia an sum sen hnem ber ṭum an tawng a, pound maktaduai 135 an seng–he record hi kuminah khum a ni ta a ni.

January 2011-a transfer tawp niah khan player langsar ber chu striker pathum an ni a, Liverpool an inrawlh vek–an striker chhuanvawr Fernando Torres chu pound maktaduai 50-in Chelsea hnenah an hralh a, Reds hian pound maktaduai 22.7 man Ajax striker Luis Suarez leh Newcastle United aṭangin pound maktaduai 35-in Andy Carroll an lalut ve bawk.

Kum sarih a liam a, record thar siam a ni–striker bawk an langsar a, Liverpool ni loin Chelsea an inrawlh vek thung. Blues hian Michy Batshuayi chu Borussia Dortmund lamah loan-in an kaltir a, hei vang hian Auba chuan Arsenal a zawm thei a, Gunners-in Stamford Bridge lamah Giroud an kaltir theih phah thung.

January record
Kumin thlasik transfer hi transfer tawp nia sum sen hnem ber ṭum a ni mai lo a, January-a transfer atana club ten pawisa an sen hnem ber ṭum a ni nghal–kum 2011 khan January-ah Premier League club ten player lei nan pound maktaduai 225 an seng a, kumina an sum sen khumna zat hi pound maktaduai 205 lai a tling.

Transfer bazar inhawn niah sum a hraw nghal a, Liverpool chuan pound maktanduai 75-in Virgil van Dijk chu Southampton aṭangin an lalut. Hemi ni vek hian Leicester City chuan Sporting Lisbon midfielder Adrien Silva chu pound maktaduai 22-in an lalut bawk–Portuguese midfielder hi August 2017-a second 14-a an tlai avanga an lakluh theih tak loh kha a ni.

January kar tirah sum a chhuak hnem nghal hle–Reds leh Foxes sum sen ringawt pawh pound maktaduai 97 a nih laiin Everton chuan pound maktaduai 27 an seng ve lehnghal a, Besiktas aṭangin forward Cenk Tosun an lalut. 2017-18 season transfer bazar-a Premier League club-te sum sen zat hi pound tluklehdingawn 1.9 a tling.

Big Six leh sum
Premier League-ah club langsar bik paruk an awm a, an hmingah ‘Big Six’ tih niin Arsenal, Chelsea, Liverpool, Manchester City, Manchester United leh Tottenham an ni–heng club langsar te tan hian champion mai ni loin Champions League khelh phak pawh thil harsa a ni tawh a, transfer bazar-a an sum sen pawh a sang chak hle.

January 2017-ah Big Six ten sum an seng tlem a, £40,000 bak an hmang lo! Kuminah erawh club parukte sum sen belhkhawm ringawt pawh pound maktaduai 265 a ni. Kumin transfer bazar ngaihnawm chhan pakhat chu World Cup vang niin a lang a, World Cup khelh kum a nih avangin player-ten an khelh phakna tur club zawnga chhuah an hreh lo.

Big Six club zingah Manchester United leh Arsenal-in player an inthleng a, Alexis Sanchez-a’n United a pan laiin Henrikh Mkhitaryan-a’n Gunners a pan thung. City-in pound maktaduai 57-in Athletic Bilbao defender Aymeric Laporte an lalut a, Pep Guardiola enkawl team hian Riyad Mahrez an la thei lo thung–Algerian forward manah hian Leicester City chuan pound maktaduai 95 an phut a, City-in heti zat thehchhuah an huam lo.

Europe thlirna
European top five league-a January transfer-a che na ber Premier League club ten pound maktaduai 430 an seng a, anmahni hnaih bertu La Liga sum sen zat chu pound maktaduai 250 a ni. Bundesliga-in pound maktaduai 65 an seng a, Ligue 1-in pound maktaduai 50 an sen laiin Serie A sen zat erawh pound maktaduai 20 a ni.

January transfer-a player langsar ber erawh Brazil playmaker Philippe Coutinho a ni a, Liverpool player pawimawh hi Barcelona chuan pound maktaduai 142-in an chhuhsak–khawvela footballer manto pahnihna a ni nghal.

Club langsar ni lo zingah Barcelona, Inter Milan leh Chelsea forward hlui Samuel Eto’o chuan Turkish cluub Antalyaspor chhuahsanin Super Lig club vek Konyaspor a zawm a, AS Monaco chuan pound maktaduai 18-in Genoa forward Pietro Pellegri an lalut a, Australia legend Tim Cahill chuan kum 14 hnuah a professional career ṭanna Milwall a pan leh bawk.