MFA Futsal-ah team 16 chiah an dam ta

RFL Plastics MFA Futsal League group stage chu Nilaini zan khan khelh zawh a ni a, inelna ṭantirha che ṭha zinga mi Laipuitlang leh Ramhlun Venglai tan quarterfinal-ah hmun a awm lo.

Group B aṭangin Armed Veng South, Durtlang, Dinthar leh Ramhlun South te an tling a, group A aṭangin Chanmari, Chhinga Veng, Electric Veng leh Saron Veng te an tling tawh bawk. Quarterfinal hi February 6-9 ah R. Dengṭhuama Multipurpose Hall-ah khelh a ni ang.

Group stage tawp zan
Laipuitlang leh Ramhlun Venglai ten match hmasa ber an khel a, team pahnih tan draw a thiang tawh lo chungin 4-4 in an inhnehtawk. Inkhelh zawhah RVL tan semifinal beiseina a tawp nghal a, Laipuitlang erawh inkhel dang result-ah an innghat.

Dinthar leh Ramhlun South ten an chhunzawm a, Laipuitlang an chak zawh loh avangin Dinthar FC-in quarterfinal an lut tawh. Ramhlun South-in chak an mamawh a, 2-1 a an hnufual hnuah tho chhuak lehin 3-2 a hnehna an chan avnagin knockout stage an lut a, Laipui-tlang an tla thung.

Match thumnaah relegate tur zawnna neih a ni a, Ramtharin him turin Ramhlun North lakah point khat chiah an mamawh nachungin point thum an sual chhuak a, MFA Futsal League an khel zel ang. Ramhlun North erawh chak ni hmel an hmu lo a, Kanan Veng hnung zuiin Division One-ah an relegate.

Match tawp berah group hmahruaitu inchuhna a awm a, Durtlang leh Armed Veng South te 4-4 a an inhnehtawk avangin inkhelh hmaa pakhatna dinhmun luahtu AVS-in hmahruaitu nichungin group stage an khar.